Na fin aña: Cuater fundacion a ricibi donacion fo’i AHATA

Aruba Hotel & Tourism Association a haci varios donacion na fin di 2022 como uno di varios manera cu e asociacion di turismo ta contribui na Aruba su comunidad. Segun Tisa LaSorte, CEO di AHATA, e asociacion a scoge cuater fundacion pa ricibi e fondonan cu ta yuda nan esfuerso continuo y importante pa mehora e bienestar di hende na nos pais.

Pa Fundacion Pa Nos Muchanan, Swinda Dumfries a ricibi e donacion, cual lo yuda nan esfuersonan pa logra desaroyo optimal di mucha. FPNM ta traha pa capacita e mayor- y educadornan pa duna bon guia y educacion cu e meta pa yuda mucha tin oportunidad y stimulacion.

Pa Fundacion Respeta Mi, e representantenan Tian Xie y Micheline Mathurin a ricibi e donacion cu ta contribui na e esfuersonan pa yuda combati abuso di mucha. E fundacion ta dedica na prevencion door di educa muchanan y mayornan, y brinda informacion na profesionalnan cu ta traha cu mucha.

Pa Digital Natives of Aruba, representante Jean-Pierre Solognier a ricibi un donacion di AHATA pa sostene nan programa di Code Club. E programa ta ofrece les gratis na mucha pa siña coding cual ta duna e muchanan conocemento den tecnologia y oportunidad pa trabao despues.

Pa Scubble Bubbles, e representantenan Nichole Danser y Arianne Ruey Gara a ricibi un donacion di AHATA pa yuda cu restauracion di coral na Aruba. Aruba su naturalesa maritimo a sufri hopi daño den ultimo decadanan, y Scubble Bubbles ta dedica na restauracion di coral cual ta importante pa nos eco-sistema.