Muzaninn Wever (AVP): Gobierno ta impone medida y kibra e empresanan

Durante e mensahe di fin di aña di Partido AVP, candidato Muzaninn Wever a refleciona a riba e maneho financiero/economico inadecua di e aña anterior cu a causo hopi preocupacion cerca e comerciante(nan). Enves di enfoca ariba diversificacion di nos economia, inversion strategico pa impulsa economia y ofrece oportunidadnan nobo ta castiga comerciante y cuidadano nan cu medida doloroso. 

Muzaninn Wever a vocifera e dolor y agonia aki durante su discurso di fin di aña: “Gobierno simplemente ta kibrando e empresanan. E medidanan cu Gobierno a bin cu ne ta fractura e wes’i lomba di nos economia. Na final di dia ta afecta henter e pueblo”, segun Muzaninn Wever, candidato di Partido AVP.

No tin atencion pa mehora e poder di compra di nos cuidadanonan cu tin su efecto directo pa economia di nos Pais, sinembargo ta impone mas medida cu ta inhusto, contra efectivo y sin nuin forma di consulta. Muzaninn Wever mirando su legado como yui di mayornan cu a crea un empresa chikito, ta subraya “Ora bo kibra negoshinan chikito y kibra forsa di compra di Pueblo, bo ta kibra nos economia y nos bida mes! Kibrando e companianan mediano y chikito ta pone e cuponan di trabao tambe na peliger”.

Muzaninn Wever a elabora elocuentemente tocante e inspiracion pa e maneho cu lo mester brinda perspectiva positvo y alivio na nos comerciante y nos consumidornan bisando: “ E Bon Comun, e pensamento di traha na beneficio di tur, ta reta nos pa fiha un maneho cu ta brinda oportunidad pa tur ! Nos consumidornan y nos comerciantenan mester di un alivio y un pespectiva positivo.”.

Muzaninn Wever ta desea  comunidad di Aruba un Bon aña y ta anima nos tur pa hunto lucha pa e cambio contra medida y destruccion. Hunto nos lo trece e cambio necesario cu lo haci e aña nobo aki un bon aña.