Muzaninn Wever a anuncia su retiro for di Partido AVP

“Cu hopi duele y tristesa na mi curason pero cu un conviccion fuerte pa e decision tuma, mi ta anuncia cu mi a entrega mi retiro como candidato for di Partido AVP na lider di partido, Mike Eman”, asina e relato di mr. Muzaninn Wever ta inicia bisando. E tabata candidato # 15 riba lista di AVP den eleccion na aña 2021 y a haya 87 voto individual.

Muzaninn ta yiu di defunto Mary Wever-Lacle, un señora comerciante y politico alabes. El a sirbi como Minister di Enseñansa den Gabinete Eman III, entre 1998 y 2001. Despues a ocupa varios funcion den seno di Partido AVP of hasta Fundacion 18 di Maart, na honor di e prome Rubianonan cu a firma pa nos haya un status separa for di Antias.

“E rason di mi retiro ta serio pero simpel pa compronde: mi a realisa cu mi no ta comparti e vision di partido y ta sinti cu ken mi ta – esta un persona profesional, critico pero vooral di principio – no ta pas den e constelacion actual di partido. Den palabra di mi difunto mama, mi semper tawata AVP pero by choice, not by chance. Y esey tawata pasobra mi semper a kere den e ideologia di partido, e base fundamental cu a uni nos. AVP ta e partido di solucion y esun cu e vision progresivo pa futuro, e partido di personanan cualifica, profesional y cu un amor pa nos pais. Den e antesala pa eleccion 2021, prome cu gobierno a cay mes, AVP a envolvi candidato, candidato potencial, activista y dirigente di bario den combersacion pa fiha un futuro pa partido. Den esaki nos tur a carga e vision e.o pa renobacion di partido, pa presenta nos mes como e unico opcion pa trece prosperidad bek na nos pueblo, pa atrae young professionals cu gana pa sirbi Aruba. Mi a contesta e yamada aki y a acepta e reto cu speransa di por contribui positivamente na desaroyo y cambio real pa Aruba, pero tambe pa partido, cu un vision nobo, un biento fresco pero cu sosten di e hala di experiencia. Esaki tawata mi expectativa.”

Partidonan y AVP no ta excepcion, ta pasa den periodo di gloria y periodo di reto. “Normalmente hunto nos ta yega na solucion tanten tur hende ta actua di buena fe, respeta otro y primordialmente, papia berdad”, e candiato a duna di conoce. El a sigui bisa cu “Locual a transcuri durante e ultimo simannan, sinembargo, particularmente e conflicto publico entre coleganan di partido R. Santos do Nascimento y G. Croes na un banda y M. de Meza na e otro y tambe e consecuencianan pa partido relaciona cu e decision di hues pa e caso di B. Sevinger, lamentabelmente a causa un realisacion cu locual ami ta kere aden y para p’e no ta aligna cu partido. E diferencia den pensamento ta demasiado grandi y pa cual mi no por ofrece defensa”, segun Muzaninn Wever.

E dos rapportnan devastador di CAD encuanto e acuerdo entre ex-minister Briesen y Tafonelli, e conseho positivo di un hurista di casacion pa continua cu e caso contra Briesen y e contract entre Gobierno di Aruba (de Meza) y Briesen pa libr’e di tur persecusion den futuro, tur esaki ta un malhecho den dia cla. No divulga e documentonan aki na bo coleganan den parlamento ta haci e malhecho mas grave ainda. Y pa net e coleganan wordo demonisa den nan mesun partido pasobra nan a wordo gaña ta manera culpa e victima y eleva e agresor. 

Ta conoci cu Sevinger tin dos decision di culpabilidad di hues. E lecho cu e caso a inicia cu un persecusion politico no ta e punto pasobra, asina mes, toch hues a constata dos acto condenabel. Ta posibel cu despues di apela e decision di hues, e wordo libra di culpabilidad. Esaki no ta kita afo cu awo, na e momento aki, e ta culpabel den wowo di ley. Y pa e periodo cu su caso ta pendiente, esaki no ta cambia. E echo aki lo continua haci daño na e credibilidad y reputacion di partido y tur cu ta asocia na dje.

Ta incorecto pa para banda di esun cu a libra un politico di a comete un acto contra ley di comptabilidad y keda keto riba su rol den libr’e pa despues pueblo tin cu carga cu e gasto. Of den e otro caso hasta celebra cu no ta tur seis acusacion sino dos “so” a haya culpabilidad. Similar, no tin diferencia di culpabilidad si bo horta 100 florin of 20 florin. No atende debidamente cu ta compromete e credibilidad di e organisacion, ta mancha tur esnan cu ta parti di dje, ta descurasha otro profesionalnan cu aspiracion pa drenta politica y ta manda un señal robes pa pueblo. 

Pueblo ta continuamente sclama pa un politica nobo, un politica limpi, un politica cu no ta den beneficio propio sino den beneficio di tur. Pa logra e meta aki mester evita e minimo apariencia di malhecho of conflicto di interes. Un politica nobo ta rekeri pa nos tur kita e bril partidario y wak hecho y duna credito of critica ora esaki ta mereci, ken cu e por ta, y mas ainda ora ta trata esnan den nos mesun circulo. Ora e control interno faya, e impresion publico di politica y di e politico ta sufri un kiebre irreparabel. E forma di politica mester experiencia un cambio.

“Na tur mi votadonan durante eleccion 2021: un danki atrobe; e honor ta di mi pa a ricibi boso confiansa y sosten di voto. Mientrastanto mi lo sigui sirbi pueblo den mi funcion diario y via organisacionnan cu mi ta forma parti di dje”, asina Muzaninn Wever a despedi.