Museo Arqueologico Nacional Aruba ta organisa webinar tocante DNA

Gustosamente MANA (Museo Arqueologico Nacional Aruba) ta extende un invitacion special na tur interesado di arkeologia y historia di Aruba pa participa na e webinar menciona, cu lo tuma luga dia 29 di september cuminsando pa 2 :00 di merdia.  E lectura digital ta tocante DNA antiguo, cu ta material di “cromosoma” saca di e restonan arkeologico. E tecnica pa saca DNA antiguo a revoluciona e ramo di arkeologia y a resulta den perspectiva nobo riba historia di humanidad y riba historia di nos famianan.

Recobra DNA antiguo den e regionnan tropical ta un reto grandi. E clima calor y humedo ta acelera e procesonan kimico cu ta fragmenta e material genetico y ta haci dificil pa saca esaki. 

Durante e ultimo cuater aña, un combinacion di metodo nobo a yuda surpasa e dificultadnan indica. A haci dos estudio genetico riba gran escala y publica na 2020. Nan ta sostene e teorianan den arkeologia di Caribe cu ta revela e distinccion genetico entre e Periode Arcaico (prome habitantenan) y Periodo Ceramico. Tambe a descubri conexion genetico entre hende y isla di Caribe.

E webinar ta un introduccion di DNA antiguo y su retonan specialmente den region tropical. Lo elabora riba e metodonan uza pa supera e retonan y e resultadonan logra den ultimo añanan. Sinembargo tin hopi pregunta pa contesta. 

Muestranan di sitio arkeologico di Aruba ta investiga actualmente pa yena e bashinan constata. Durante e lectura digital lo duna un resumen general di e resultadonan di conservacion  di e materialnan genetico arkeologico di Aruba. Ademas lo indica cua muestra lo sigui studia den un analisis genomico (di paarnan di cromosoma) mas amplio. E estudio ultimo menciona ta dirigi riba e diversidad genetico di Aruba durante su historia y ta investiga su conexionnan cu otro islanan den Caribe y tera firme di Sur America.  Den e estudionan aki colaboracion cu arkeologonan Arubano ta instrumental. 

E lectura digital aki ta pa lanta interes di publico general y pa haya mihor bista riba nan pregunta relaciona cu historia humano antiguo di Aruba y Caribe. E lo ta na Ingles y ta na encargo di dr. Kathrin Nägele, cu ta un investigado post-doctorado na Instituto Max Planck pa Antropologia Evolucionario na Leipzig-Alemania. Dr. Nägele ta concentra riba historia di poblamento di Caribe y Gran Caribe. Durante su investigacion pa doctorado/PhD na Instituto Max Planck pa Ciencia di Historia Humano, el a bira experto den colecta DNA di e regionnan cu poco preservacion di material genetico. E ta uza su conocimento y experticio den e regionnan tropical, cu enfoke riba Caribe y Oceano Pacifico. For di su estudio pa biologo marino el a desaroya su punto di bista cu oceanonan ta conectornan y no barera.  Entrante januari 2023 dr. Nägele lo dirigi su propio grupo di trabou cu ta enfoca riba poblamento di Caribe for di perspectiva di arkeologia genetico. 

E lectura digital “Ancient DNA and the genetic history of the Caribbean” ta riba 29 di september awor, di 14.00 – 16:00 ora di Aruba.  Pa participa conecta via: 

Join Zoom Meeting
https://universiteitleiden.zoom.us/j/67443822977?pwd=d0hBaEhkY1FqVTFLM1hIVFZuVi9wZz09

Meeting ID: 674 4382 2977
Passcode: Q3c%1Uj7