mr. drs.  Ryçond Santos do Nascimento (AVP): Tin espacio pa mehora relacion cu Hulanda

Den un declaracion haci diamars mainta, e parlamentario di Partido di Pueblo Arubano (AVP), mr. drs.  Ryçond Santos do Nascimento a duna di conoce cu tin espacio pa mehora relacion cu Hulanda y cu e ta depende di nos tur; di mandatario y politiconan di Hulanda y di Aruba, pero tambe di e ciudanonan. Ta necesario pa Aruba cuminsa wak su autonomia como un responsabilidad y nos un derecho y pa Hulanda haci mescos cu e articulo di statuut cu ta autoris’e pa interveni ora algo ta bay robes.

E parlamentario a indica cu tin espacio pa nos haci miho uzo di IPKO y ora cu ta papia cu e parlamento y delegacionnan di Aruba, Corsou, St. Maarten y Hulanda. Ora nos para keto riba esaki y wak kico a pasa e ultimo IPKO, e parlamentario mester a bisa, na prome luga, cu e ta sumamente orguyoso di fraccion di AVP.

“Nos a bay prepara, nos a duna un contribucion hopi al caso, cu contenido riba e diferente discusion pa loke tabata deficit democratico, racismo, colonialismo, posicion di nos studiantenan na Hulanda. Tabatin varios topico di interes pa Aruba, pa nos studiantenan, pa nos hendenan,” asina Santos do Nascimento a bisa.

Na mesun momento a wak ta manera un staatsraad pa Corsou cu ta Paul Comenencia, kende a vocifera e idea cu nos den Caribe por saca hopi mas for di e combersaciony dialogo cu Hulanda si nos manda hende prepara; si nos a manda hende cu e capacidad y si nos no ta haci, manera e mes a bisa, haci friends and family.

Na final di dia loke el a bisa nos ta: cu Aruba, na e momento aki, ta den crisis. E ciudadano, na e momento aki, ta pasa den necesidad; den momentonan dificil, pero juist den momentonan dificil tin espacio pa aspira pa mas; tin espacio pa desea mas; tin espacio pa nos lucha, eleva, no solamente nos bida, pero e bida di henter nos comunidad.

E cambio aki ta cu cada un di nos ta cuminsa anhela y duna bek na nos comunidad; e ta rekeri pa cada un di nos anhela pa nos lucha pa mehora nos mes y di e forma ey tambe nos tin un impacto riba nos sernan keri rond di nos; di e forma ey, na final di dia nos tin impacto riba Aruba henter.

Santos do Nascimento: “Tin un trabou grandi pa haci. E ta cuminsa na cada un di nos pasobra si nos no cambia na cas, e ora ey politica no por cambia; pero si ciudadano ta informa su mes, ta educa su mes, kico lo pasa? Abo ta bay exigi gobernacion di calidad. E ora ey e politico no por get away cu mentira, no por get away cu balia bo rond di diferente topico. Pakico no? Pasobra abo ta informa, pasobra bo ta exigi gobernacion di calidad.”

E parlamentario ta convenci cu nos comunidad ta aspira pa algo mas grandi. Como comunidad nos ta kere cu nos ta den dificultad, pero tin speransa y espacio pa yega na halturanan mas halto y nos tin un pasado cu ta confirma esaki. E generacionnan cu a percura cu awe nos tin un Status Aparte, cu awe nos tin un infrastructura di turismo cu ta resiliente, cu awe nos como pais chikito por ta hopi orguyoso cu nos a marca historia haciendo di Aruba un perla den Caribe y haciendo di Aruba un pais sumamente competitivo.

Tin espacio pa mas; tin espacio pa nos crece; tin espacio pa nos eleva y tambe tin un aspecto di kico ta nos mensahe pa Hulanda. “Ora nos a wak e posicion di nos autonomia, hopi biaha nos a wak e como un derecho, pero ta tempo pa nos politiconan wak e autonomia como un responsabilidad grandi pa goberna e pais y eleva e nivel di bida, eleva e alegria y e felicidad den cada hogar. Esey ta e responsabilidad. Ora bo ta wak e autonomia como un responsabilidad, bo ta realisa bo mes cu nos tin yen di dificultad cu nos mes no por carga e responsabilida completamente riba nos mes.”

Algun ehempel cu e parlamentario di AVP a duna ta maneho di sushi y KIA. Segun Santos do Nascimento, asina diferente cos cu nos mester bay atende cu nan, manera derecho humano y asina tin mas aspecto cu mester di ayudo. Anto e ora nos ta wak kico e relacion cu Hulanda por nifica.

E ta nifica di banda di Hulanda tambe un cambio di pensamento. Cu Hulanda ta wak e waarborgfunctie, e articulo 43, inciso 2 cu ta duna Hulanda e base legal pa por interveni despues cu algo cu ta sosode; wak e na un manera diferente. Wak e como base pa yuda di berdad, como responsabilidad y no como derecho. Mi ta kere esey ta un manera completamente diferente pa wak e reino, pasobra e ta un manera cu ta ancra den pensamento cu nos mester percura pa e bon comun aki na Aruba y den reino y den mundo henter.