Meteorological Department Curacao
Motibu ku temperatura ambiental midí den un outo ta diferente for di esun midí dor di servisio meteorologiko di Kòrsou.
Den e temporada di kalor eksesivo aki un pregunta ku ta bin dilanti na varios okashon ta dikon e temperatura ku ta wordu midi den auto ta diferente di esun ofisialmente emití dor di servisio meteorológiko.
Midimentu di temperatura ambiental ta referi na e temperatura di airu. Pa por hasi esaki mester pone normanan pa tur ekipo ku ta hasi e medishon. Asina por hasi komparashon entre stashonan den kualkier temporada.
Eksigenshanan pa midi temperatura ambiental
1. E temperatura mester wòrdu midi na un altura di 1.5 meter for di
suela.
2. E sensor (tèrmometer) mester ta protehá dor di un “shield”
blanku for di rayonan direkto di solo, pues den sombra.
3. Mester tin un bon fluho di aire liber.
4. E suela mester ta di yerba òf simplemente tera.
5. E mester ta kubrí for di áwaseru òf otro kos ku ta òf por
kontaminá e midimentu.
Di kon e diferensha?
Awendia e tèrmometernan (sensor) usá den e vehikulo ta di un kalidat aseptabel.
Nan presishon ta hopi bon, den e kaso aki no ta e un fuente di eror.
Loke sí ta di hopi balor ta e eksigenshanan usá pa yega na e temperatura.
Manera a wordu menshona ariba.
Loke por kontaminá e midimentu den un outo na hopi okashon ta e kaminda ku e tèrmometer ta instalá. Hopi biaha e ta instalá dilanti den e “shell” (front grill) òf bou di e spil pafó, na banda di shofùr di e vehíkulo. I esaki no ta kumpli ku e eksigenshanan ya menshoná. Loke tambe ta hunga ròl ta e suela di asfalt (koló skur) òf otro superfisie ku ta kambia e medio ambiente di midimentu. Otro faktor ku ta hunga un ròl ta ”damp” di kayente ku e vehikulo ta emití.
Tur esakinan ta di influensha riba e midimentu di temperatura i ta kausa un diferensha.
