Molotov den Bushiri: Diferente unidad di polis presente pa atende cu e situacion

Problematica serio na momento cu grupo di hoben a rebeldia y manda molotov riba caminda den Bushiri Complex. Tur esaki tin di haber cu un situacion cu a surgi den ora di mainta, ora cu polis di bario a haci un limpiesa y deshaci di artefacto y muebles cu tabatin rond den e area. 

Tin indicacion cu e grupo di hoben no a aprecia cu a ‘ruim op’ e area caminda cu hopi hoben ta hang around y causa molester na habitantenan di e bario. A compronde tambe cu a confisca brommer y vario otro obheto y asina purba di elmina e samenschooling cu ta tuma luga tur dia den e bario di Bushiri.

Pero no a tarda mucho cu a cuminsa haya informacion cu un grupo di hopen lo a cuminsa aglomera y prepara un acto di rebeldia pa asina demostra nan malcontento. Den careda di 11:00 pm, diferente unidad di polis mester a bay direccion Bushiri Complex pa asina atende cu e situacion cu a surgi. A bin topa cu un candela basta grandi meymey caminda.

A tira un molotov cu a crea un candela basta grandi. Brandweer tambe a presenta pa asina combati esaki mientras polis a cuminsa un buskeda den e area. A duna descripcion di varios hoben pero na yegada no a bin encontra cu e sospechosonan.

A señala tambe un grupo di hoben den cercania di un of mas auto eybanda. Despues di controla a bin constata cu tin dos vehiculo habri, cu pertenecia aden y yabi auto pega ainda na dje pero ningun hende no a bin dilanti pa asumi cu nan ta doño di ningun di e autonan presente.

No a keda nada otro cu confisca ambos vehiculo y transporta nan pa warda di polis. Durante dia lo keda en espera di propietario presenta na warda pa recupera su vehiculo y na mes momento tambe duna cuenta na polis di nan presencia na Bushiri relaciona cu e candela cu a tuma luga.