Miss Universe Aruba siñando mas di con pa yuda otro

Como parti di su estadia na New York, e actual Miss Universe Aruba, Kiara Arends a realisa recientemente un bishita na e sede principal di Smile Train. Esaki ta forma parti di e contacto cu reina Arubiano di beyesa ta hibando cu Miss Universe Organization pa loke ta trata e aspecto social di e certamen.

“Como un persona cu tin un organisacion dedica na yuda mamanan den necesidad, bishita e sede di Smile Train a inspira den asina hopi manera,” Kiara a comenta refiriendo na Benefiting Upcoming Moms during the Pandemic cual ta un fundacion cu el a lanta na 2020 pa yuda futuro mama y mucha te cu tres aña. E ta spera di por colabora cu e organisacion den futuro pa crea conscientisacion y cambio cu ta beneficia mamanan den necesidad rond mundo.

Tocante Smile Train

Smile Train ta un organisacion no lucrativo y di caridad cu ta brinda cirugia pa coregi cleft lip y palate cerca mucha. Funda na 1999, e ta opera na 87 pais pa medio di entrena dokter local y duna fondo na hospital pa e cirugianan. Cleft lip y palate ta un defecto di nacemento caminda e tehido (carni) di shel’i boca of e parti ariba di e lip no a cera full. Smile Train un socio di e Miss Universe Organization.

Adicional na trabou social, Arends tambe a participa den desfile di moda pa New York Fashion Week y sesion di potret pa Miss Universe. Tur esaki ta ganando experiencia di pasarela y presentacio na caminda pa e certamen di Miss Universe 2022 cu lo tuma luga proximo aña.