Misha Raymond (Raiz): Trahando pa introduci logopedista den pakete basico 

Parlamentario y lider di fraccion RAIZ, Misha Raymond, ta elabora riba kico e ta haciendo  pa sigura cu lo introduci logopedie pa nos muchanan den e pakete basico di AZV. 

Dia 9 di november 2021 Misha a entrega un mocion den Parlamento durante un reunion  publico cu Minister di Turismo y Salubridad Publico. E mocion aki a urgi gobierno pa inclui logopedie den e pakete basico di AZV pa asina duna tur mucha cu mester di dje, e oportunidad  pa haya esaki. E mocion a wordo aproba den Parlamento y e minister a reacciona positivo. 

Logopedie ta un di e diferente terapianan esencial p’e muchanan cu tin necesidad special den nan desaroyo. Den un combersacion cu diferente logopedista a resulta cu e muchanan cu  mas mester di e tipo di terapia aki hopi biaha ta bin di famia cu problema social y  financiero. Netamente door di esaki e muchanan aki mester mas sosten di nos structura di  cuido pa nan no wordo perhudica y pa nan haya e terapia necesario pa por adelanta nan  desaroyo. Asina nan ta haya un miho oportunidad pa funciona na scol, emocionalmente y den nos comunidad.  

Loading…

Taking too long?

Reload document

|

Open in new tab

Download [594.20 KB]

Despues cu a aproba e mocion, Misha a follow-up door di manda varios pregunta Parlamentario na e Minister encarga (9 di maart, 2022), cual e Minister a contesta (23 di maart,  2022). E intencion ta pa introduci logopedie den e pakete basico di AZV cuminsando na aña  2023. Considerando cu nos ta na augustus, y cu ainda tin pregunta, Misha a manda e Minister encarga diferente pregunta adicional pa e amplia mas riba e cobertura, y den ki fase e proceso pa  realisa esaki ta. Tambe Misha a skirbi un nota (“Kansengelijkheid voor kinderen die logopedie  behoeven”) pa splica mas riba e importancia y impacto cu realisacion di e meta proponi lo tin pa nos muchanan, esaki tambe a wordo entrega na e minister. 

Pais Aruba tin e responsabilidad pa percura cu ta duna sosten na esnan mas vulnerabel den  nos comunidad. Ora e sosten aki no wordo duna, nos ta papia di falta di oportunidad igual.  Mucha tin un posicion hopi vulnerabel den nos sociedad. No solamente nan ta depende di  nan mayornan y nan situacion financiero, pero tambe nan ta depende di un gobierno cu nan no  por scoge. Ta pa e motibo aki mester percura cu e posicion, e desaroyo, y e necesidad di nos  muchanan semper ta un prioridad pa Parlamento y Gobierno di Aruba.