Misha Raymond (RAIZ): A entrega OM dossier di investigacion riba Arubahuis y confiansa ta sigui

Prome minister tabata den parlamento pa trata e rapport haci riba Arubahuis. E mandatario a informa parlamento dje suma malgasta p’e minister plenipotenciario.

Si Misha Raymond, parlamentario (RAIZ), tin confiansa den e gobierno di coalicion, el a indica como a entrega peticion na Ministerio Publico. Pero si no a haci esey, e ora si e lo cuestiona su confiansa den coalicion. Na momento cu entrega e dossier na Ministerio Publico cu ta bay haci e investigacion penal, e tin confiansa den e coalicion.

Aunke cu el a haya e pregunta un tiki triki, el a indica cu mester mir’e pa caso. Si no a entrega e dossier na Ministerio Publico, e lo a cuestiona pakico no. Si a cana henter e caminda y hopi cos a bin dilanti ta cuestionabel, esey ta motibo suficiente pa entrega e caso na Ministerio Publico. Esey ta algo cu a pasa diamars mainta.

E parlamentario a indica cu e ta bergonsoso pa mira un mandatario den e funcion ey con y kico el a haci cu e fondonan ey. Tambe e ta haya esey algo alarmante, bergonsoso y unda e compas moral ta, esta con ta haci uzo dje placa, bo sentido comun. Esey ta algo cu mas tanto el a mira.

A opta pa no yama un reunion publico, pero un encuentro publico y no por a pasa mocion. Segun Raymond, esaki tabata decision di e presidente, pero e ta kere cu ta bon pa bin c’un reunion publico riba e peticion di oposicion. Minister Ursell Arends no tabata presente, pasobra el a biaha pa trabou pero diaranson e ta bek.

Tambe e ta spera cu nan por sigui dilanti cu e informacion ricibi den un otro encuentro, pa asina ey oposicion y coalicion por vocifera nan mes na diferente manera, pa por bin cu mocion, pa urgi gobierno haci cosnan. E ta di pensamento cu esey ta na su luga.

E pregunta ta kico ta bay cu integridad y p’e parlamentario e proceso mustra unda cu un prome minister activamente ta entrega keho na Ministerio Publico di un di su ambtenaarnan cu ta bou di su mando. Pa Raymond personalmente, esaki ta algo cu nunca el a mira. Den comparacion di esaki cu cierto proceso ta andando, cu a pasa den pasado, e comportacion di lider, e comportacion di e minister presidente n’e momento ey, ta algo cu ta bisa hopi na unda kier hiba integridad.

Lesa mas den TREMPAN.