Minister Xiomara Maduro ta invita pa sintonisa un programa informativo riba Presupuesto 2023 di Pais Aruba
Dia 1 di september ultimo, Minister Xiomara Maduro di Finansa a entrega e Presupuesto 2023 di Pais Aruba na Parlamento. Esaki ta algo historico, ya cu ta despues di 15 aña un Minister di Finansa ta logra entrega e Presupuesto na tempo segun nos Constitucion.
En conexion cu esaki, Minister di Finansa ta presenta un programa informativo durante cual e mandatario lo splica tocante e impacto cu COVID19 tabatin riba nos finansa publico, lo duna un bista di e historia financiero di e deficit y tambe lo mustra con den tres aña di tempo a logra baha e deficit drasticamante di 1028 miyon pa 25 miyon florin. Finalmente Minister Maduro lo elabora riba e cifranan mas importante den e Presupuesto 2023 di Pais Aruba.
E programa aki lo wordo pasa dialuna 12 di september pa 7’or di anochi na Telearuba Canal 13 y diamars 13 di september pa 8’or di anochi na Diario TV Canal 48.
