Minister Wever y Reina Maxima a bishita Google na San Fransisco

Diaranson merdia Reina Maxima y Minister Geoffrey Wever di Aruba tabata di bishita n’e oficina principal di e compania di tecnologia Google. Den e encuentro aki nan a papia cu ehecutivonan di Google kende a splicanan e ideanna di futuro y tambe un presentacion di e opcionan nobo di Google Earth.

A demonstra con por haci uzo di Google Earth pa yuda combati problema climatologico. Entre otro, e satelitenan di Google por haci diferente calculacion di e.o energia cu por genera pa medio di panelnan solar y mas. Durante e combersacion Google a indica tambe cu nan deseo ta pa nan ‘Data Center’s ta ‘Net Zero’, pues opera cu energia limpi/sostenibel.

Aki Minister Wever a comparti cu Aruba sigur lo por ta un opcion mirando cu nos elementonan natural ta hopi faborabel pa cu esaki. Na final e delegacion a haya un bista di cerca di e ‘campus’ nobo di Google cu ta den su fase final di construccion.

E ‘campus’s aki tin un arkitectura unico y su dak ta inspira pa un dragon. Den e ‘campus’ aki lo tin espacio pa 4000 empleado. Google ta un compania global cu mas di 160.000 empleado. 40.000 di nan ta basa na California.