Minister Wever: E siman aki lo tin anuncio riba prijs di webo

Diaranson mainta tabatin den Parlamento di Aruba un reunion publico den cual Minister di Asuntonan Economico, Comunicacion y Desaroyo Sostenibel, mr. Geoffrey Wever a informa tocante maneho pa lanta negoshi. Durante esaki, y riba pregunta di parlamentario, mr. Gerlien Croes, e mandatario a informa cu e reciente aumento di prijs di webo ta relaciona cu e inflacion na nivel internacional. Sinembargo, a anticipa cu p’e siman aki gobierno lo tin un anuncio pa loke ta trata e productornan local di e producto.

Tras e reaccionnan den fin di siman di parti di ciudadano, y te hasta un propio colega di parlamento di Aruba riba loke ta e aumento exorbitante di prijs di webo, Parlamentario Croes a tuma e oportunidad pa puntra Minister di Asuntonan Economico tocante e control cu mester tin riba prijs di esaki y di otro producto den canasta basico. Minister Wever a contesta cu e control di parti di Departamento di Asuntonan Economico ta sosode continuamente.

A añadi cu ta trahando actualmente riba un revision di e prijs di webo local. El a tuma nota cu e gastonan di e productor local a aumenta enormemente. “Nan ta lucha. Ta un decision cu nos mester tuma. Nos ta bezig cu ne tur e dianan aki pa por yega na ahuste di prijs y pa e productor di webo local keda na bida,” tabata e palabranan di Minister Wever den Parlamento diaranson mainta splicando cu e sector aki tambe ta limita pa e prijsnan maximo. A anuncia cu e siman aki probablemente lo bin cu un anuncio oficial.