Minister Ursell Arends: Ceramento di dump ta inicio di economia circular

Dia 31 di december oficialmente lo ta e ultimo dia cu Dump di Parkietenbos lo ta habri pa publico. Kico lo cambia pa bo y bo desperdicio?

Pa e gran mayoria di nos, no lo nota ningun cambio. Dicon? Pasobra e compania cu ta busca bo sushi, ta keda mescos, y lo keda busca bo sushi mesun dia mesun ora. E meta ta pa eventualmente logra cu tur hende ta separa sushi na cas of negoshi.

Pa e sobra di e personanan cu ta hardinero, contratista, of ta hiba nan mesun sushi di cas pa Dump, lo tin diferente localidad nobo pa procesa, a base di e tipo di desperdicio. Ministerio di Naturalesa lo publica un “blueprint” (mapa) cu lo indica e diferente localidadnan posibel.

Entre otro, ya caba tin confirmacion di e siguiente desperdicionan:
• Green Waste (mata, yerba, palo di mata) – na Ecotech of Johnsons
• Metal, Wacharaca, Bateria etc. – Daltra of ICR Services
• Concreto/Demolicion – APEX 
• Taira – Ecotech of Carentra 
• Sushi mixto (Cas + Hardin + Otro) – Ecotech 

E ta importante pa compronde, cu mientras e infrastructura pa un economia circular, pa reciclahe etc. ainda no ta na su luga debido, cu ya caba nos tin suficiente solucion basico pa por cera Dump di Parkietenbos, pa asina cuminsa e proceso di tapa esaki pa e bira den un Parke Solar.

Lo tin mas opcion den futuro cercano pa caminda pa hiba plastic, glas y otro tipo di desperdicio, cu e meta cu e companianan aki lo recicla mas tanto posibel.

Cualkier paso den e bon direccion, ta un salto grandi pa Aruba. Den e caso aki, moviendo for di un “Open Dump” pa un “Sanitary Landfill”, caminda ta compacta y empaketa e desperdicio cu no por a reuza of recicla, ta un salto grandi pa Aruba su medio ambiente, y esey ta loke Gobierno di Aruba ta para p’e. E lucha pa un maneho di desperdicio optimal ta simplemente na su inicio.