Den kuadro di rekonsiderashon di kalkulashon di entradanan kumbre (heroverweging berekening topinkomens) di e funshonarionan den tòp, Gabinete Pisas II a bai di akuerdo pa entregá un nota di modifikashon.
Minister di Finansa a duna e gerensia di kompanianan relashoná ku/di gobièrnu e oportunidat pa entregá informashon korekto pa loke ta konserní salario di tur e funshonarionan den tòp.
E informashonnan mester a keda entregá pa mas tardá 26 di yüli 2022.
Riba 25 di yüli minister di Finansa a risibí un karta di gerensia di ADC, Aqualectra, BT&P, CAH, CPA, CPO, KTK, DC-ANSP, Curinde i Curoil kaminda nan ta pidi suspenshon pa e entrega di informashon.
E gerensianan ta indiká ku nan mester di mas tempu pa por entregá e informashon di un forma responsabel.
Minister Silvania tin komprenshon pa esaki,i den un karta dirigí na e gerensianan, a indiká ku e ta dispuesto pa bai di akuerdo ku e suspenshon pa un solo biaha.
E fecha di entrega a bira djabièrnè 5 di ougùstùs 2022.
Minister Silvania ta spera ku e gerensianan ta tene nan mes na e palabrashon aki pa asina por kontinuá ku e nota di modifikashon mas pronto posibel.
Manera a indiká kaba, e trein no ta stòp di kore.
