Minister Silvania no ta hinka Pais Kòrsou den mas debe
WILLEMSTAD – Minister Silvania semper a enfatisá ku e nò ke hinka Pais Kòrsou den mas debe. Esaki no ta keda na palabra so. Minister Silvania a sa di tuma akshon, i e promé resultadonan ta papia pa nan mes. For di ultimo kwartal di 2021 nos tabata asina leu ku nos nò mester di fia sen serka Hulanda mas. P’esei ta keda remarkabel ku parlamentario sr. Steven Croes (PAR) ta sinti e nesesidat di pidi minister di Finansa riba Facebook pa bel sra Van Huffelen i fia 563 mion. Minister Silvania no ta kontinua ku e politika di PAR di fia sen na Hulanda i hinka Pais Kòrsou den mas debe ku nos no tin moda di paga bek.
Presidente di Cft, sr Gradus den un karta na minister di Finansa a konstata ku e posishon di liquides di Pais Kòrsou a mehora na un manera positivo te na un montante di mas ku 300 mion. Dia 15 juli 2022 Konseho di minister di Reino Hulandes a konstata ku Pais Kòrsou no mester judansa di liquides den 2022. Danki na e bon maneho di minister di Finansa e situashon finansiero di Pais Kòrsou a drecha konsiderablemente. Minister Silvania ta konsiente si ku ainda Pais Kòrsou nos no a jega ainda.
For di momento ku gabinete Pisas II a hasi su entrada, semper a komuniká di un forma transparente pa loke ta trata e problemátika di debe di Pais Kòrsou. Minister di Finansa, Javier Silvania, semper a pèrkurá pa duna splikashon pa loke ta trata e debenan di Naf 3.474.745.500 (kasi Naf 3,5 miar) ku Pais Kòrsou debe Hulanda. Pa por hanja sen na un manera struktura pa implementa e reformanan palabra den e asina jama Landspakket, ta importante pa Pais Kòrsou huntu ku Hulanda yega na akuerdonan konkreto tokante refinansiamentu di (un parti di) e debenan. E reformanan ta necesario pa duna boost na nos ekonomia.
Despues ku Konseho di Minister a bai di akuerdo, riba 29 di ougùstùs 2022 a manda un karta pa Sra. Van Huffelen, staatssecretaris Koninkrijksrelaties en Digitalisering, kaminda minister di Finansa ta hasi un petishon pa refinansiá por lo menos un parti di e debenan eksistente. E debenan ku gobiernunan anterior a sera for di 10 10 10 ta suma un montante di kasi NAf 3,5 miar kontra un porsentahe di interes promedio di 2,83%, ku ta dos biaha mas tantu ku e interes riba e merkado aktual ku ta entre 1,3% ku 1,8%.
Ta asina ku pa medio di e refinansiamentu di un parti di e debenan eksistente por yega na un redukshon di interes, ku por suma un montante di kasi 20 mion florin pa aña. Awor aki Pais Kòrsou tin ku paga alrededor di 60 mion tur aña na interes so. Ta trata aki di debenan ku un durashon entre 10 ku 30 aña. Ku refinansiamentu di (un parti) di e debenan por ekonomisá fuerte riba e gastunan di interes. E ekonomisashon aki lo por keda usá pa por hasi e reformanan nesesario den kuadro di Landspakket ku ta benefisiá nos pueblo sin ku mester krea debe nobo. Minister Silvania ta termina bisando ku ‘Refinansia debe eksistente i no hasi mas debe ta e ruta ku Kabinete Pisas II ta sigi na bienestar di pueblo di Kòrsou’.
