Minister Hato huntu ku su delegashon a realisá un eksitoso partisipashon na e Asamblea General di ICPO-INTERPOL. Manera ya ta konosí e asamblea general a tuma lugá di djamars 18 di òktober pa djabiėrnė 21 di òktober 2022 na New Delhi, India.

Den e seshonnan plenario durante e kuater (4) dianan di e kongreso a trata un total di 14 resolushon di kual Kòrsou a sostené diesdos (12). E resolushonnan por gran parti tin di haber ku fortifikashon di e Nashonal Sentral Bureau (NCB) di paisnan miembro den nan lucha kontra di kriminalidat ku ta krusa frontera, e plataforma di i-familia i un resolushon kontra di abusu seksual di mucha mediante medionan virtual.

Banda di partisipá na e seshonnan plenario Minister Hato a probechá di hiba vários bilateral ku paisnan den nos region ku tambe ta eksperiensiando retonan similar ku nos p’asina eksplorá posibilidatnan pa kolaborá riba temanan di seguridat. Den e kuadro aki Minister Hato a sostené bilateral ku delegashon di Colombia, Costa Rica, Sürnam, Republika Dominikana I Venezuela.

Mirando e echo ku Colombia ta hopi avansá den tantu e area preventivo komo investigativo di krímen ku ta lantando kabes (emerging crimes) i den kuadro di ampliashon di kooperashon polisial, Minister Hato a logra yega na palabrashon konkreto ku Colombia pa risibí entre otro training riba e tereno di ‘’cybercrime’’ pero tambe pa interkambiá ‘best practices’ riba temanan manera trato di ser humano. E intenshon ta pa formalisá e palabarashonnan aki por eskrito riba termino korto.

Despues di e intervenshon di Kòrsou riba e segundo dia, Minister Hato den e seshon plenario durante e di tres dia den kual a trata e tema “changing cyberthreat landscape: an eco-system approach to countering and combating cybercrime” tabatin un intervenshon riba e tema di cybercrime. Den kuadro di esaki Minister Hato a mustra riba e vulnerabilidat di espesialmente ‘SIDS’ (Small Island Development States) pa ku menasanan ku e tipo di krímen aki ta konstituí pa paisnan en general i SIDS, den kua Kòrsou, en partikular, i a puntra kon konkretamente INTERPOL por sostené SIDS den e problematika aki. Minister Hato tabatin e honor tambe pa sera konosí tantu e direktor di INTERPOL, sr. Ahmed Naser Al-Raisi komo e sekretario general di INTERPOL sr. Jürgen Stock.

Kòrsou por wak bèk riba un partisipashon hopi aktivo di e delegashon sakando kara di nos pais Kòrsou aya na New Delhi, India. E siguiente Asamblea General di INTERPOL lo tuma lugá na Oustria den 2023 kaminda INTERPOL a wòrdu establesé den 1923.