Minister-president: Fase di rehabilitacion lo ta te cu fin di aña

Den rueda di prensa gobierno a duna informacion riba e crisis di Covid-19. Gobierno a dicidi cu desde dialuna, 2 di september 2022, cu nan ta reduci e fase di crisis y ta bay p’e fase di rehabilitacion (herstel).

 Evelyn Wever-Croes, minister presidente, a indica cu e fase di rehabilitacion ta bay te cu 31 di december proximo. Esey ta significa cu no ta bay traha mas cu e landsbesluit, esta e decreto, ni e ministeriele regelingen (MR) basa riba e ley di calamidad. Tambe ta trek in e landsbesluit desde dialuna, 12 di september, cual a decreta Covid-19 como un crisis. E mandatario a splica cu rehabilitacion ta parti di e crisis.

 P’esey su persona kier tabata enfatico cu Aruba no a recupera completamente na 100%, pero pa loke nan tin di haci no mester sigui uza e decreto basa riba ley di calamidad. Tin dos aspecto cu tin gobierno preocupa cu ta parti di esaki. Segun e minister presidente, ta e efectonan socioeconomico cu e crisis di covid a ocasiona y cu ainda ta sintiendo. Tambe e parti di salud mental, cu ta un parti cu tin nan hopi preocupa. Esaki ta un parti delicado y tin atencion di gobierno, pero nan lo haya mas atencion den e fase aki.

RESPONSABILIDAD DI CUIDO

Desde dialuna Covid a bira manera cualkier otro situacion, di cual por compar’e por ehempel como bruela. E responsabilidad di cuido ta cerca e persona mes. Gobierno no ta bay tuma medida mas pa cuida of yuda e persona cuida. Si un persona ta sinti malo, p’e acudi na su dokter di cas. Aki nan lo gui’e den e proceso.

Pa loke ta trata e testnan, isola y cuarentena no ta un obligacion legal mas. Asina mes gobierno ta recomenda si un persona ta sinti malo, p’e haci test. En caso e test positivo, e persona isola su mes y pa famia tambe tene cuenta cu cuarentena. Tampoco lo tin control mas riba ken ta keda paden of no durante isolacion of cuarentena. “Aruba ta conta riba abo, pa abo carga e responsabilidad pa esaki no bira un crisis mas”, e mandatario a bisa durante e conferencia di prensa. Covid a causa hopi perdida y dolor, y ainda no a caba di recupera di tur esakinan.