Minister Oduber: Prevencion ta e yabi pa biba un bida mas saludabel

Diabierna atardi minister di Turismo y Salud Publico, Dangui Oduber, a inicia e conferencia di Hunto Contra Malesnan Cronico 2022, cu a tuma luga na Marriott Ballroom. Esaki ta un conferencia cu ta enfoca riba diferente topico encuanto e plan nacional di prevencion di malesanan cronico no contagiabel (NCD’s).

E mandatario a menciona cu henter e proceso a cuminsa na aña 2019 y presenta na aña 2020. Sinembargo door di e pandemia no por a continua cu e proceso di implementacion di e plan nacional di prevencion.

E conferencia ta uno hopi importante pa pais Aruba, specialmente esunnan cu ta traha den e sector di cuido medico. E meta di e conferencia ta pa scucha y haya un presentacion di e diferente experto riba nan specialidad. E comunidad di cuido medico na su turno ta haya e oportunidad pa haci diferente pregunta, intercambia ideanan y informacion. E conferencia aki ta esencial pa cuido medico por avansa y ta mas innovativo den cuadro di prevencion.

Segun e cifranan publica pa World Health Organisation, na aña 2019 un total di 55 miyon persona bou di e edad di 70 aña a fayece door di malesanan cronico no contagiabel (NCD’s).

E cuater causa di mortonan principal ta malesanan di cardiovascular, cancer, malesanan cronico respiratorio y diabetes. Aruba ta den e poco paisnan rond mundo cu tin un plan nacional di prevencion pa e malesanan aki. E meta global ta pa reduci e cantidad di mortonan relata cu e malesanan NCD’s cu 1/3 parti pa aña 2030.

“E meta principal ta pa brinda e ciudadanonan di Aruba un miho calidad di cuido medico, na unda prevencion mester ta e enfoke y yabi pa hiba un bida saludabel pa asina evita complicacionnan a consequencia di esaki. Prevencion no solamente ta importante pa evita malesa y complicacion pero siguramente ta aporta na un bon calidad di bida. E ta e yabi pa sigura un futuro sano y prospero” tabata palabranan di Minister Oduber.

Minister Oduber ta invita henter pueblo di Aruba pa pasa diasabra 24 di september na e EXPO di Salud cual lo tuma lugar na Centro Deportivo Betico Croes di 10 or di mainta te cu 5 or di atardi. Ta bay tin hopi profesional medico cu por conseha bo y mustra bo con pa hiba un bida mas saludabel.

Finalmente Minister Dangui Oduber a gradici tur persona cu tabatey presente na e conferencia di Hunto Contra Malesnan Cronico 2022. Un danki special na e team di Plataforma di Salud, Departamento di Salud Publico y Ministerio di Turismo y Salud Publico, kendenan a traha duro y a pone tur nan esfuerso pa haci e conferencia aki y e expo di diasabra bira un realidad.