Minister Oduber: Mas atraccion turistico pa Santa Cruz

Despues cu Minister di Turismo, Dangui Oduber a hiba combersacion cu e grupo cu ta organisa tur e actividadnan riba Dia di Betico, Aña di Rey na Plaza Deto Varis, nan a presenta un concepto y un idea pa haci e plaza aki un atraccion pa turista considerando e echo cu ta hopi turista, miles di turista ta trafica e area aki anualmente direccion pa entrada di Parke Arikok.

E mandatario a consider’e un bunita idea, un bunita concepto teniendo na cuenta tambe cu gobierno kier percura pa ofrece mas atraccion posibel na turista; areanan cu nan por para, disfruta, saca potret y post riba social media.

Oduber: “Sigur esaki ta un proyecto cu nos a sostene y nos a haci e tramitenan necesario pa asina, no solamente por anuncia e proyecto, pero ya caba e proyecto aki a cuminsa. Loke ta bay haci ta drecha e plasa aki den su prome fase, tambe ta bay drecha e anker pa pone un meter mas halto. Di e manera aki tur hende por tuma bon nota di dje despues cu spuit e na color di oro. Tambe den e prome fase ta traha un plasa chikito cu ta un proyecto sumamente bunita y e ta bay bira un atraccion pa turistanan.”

E idea, segun e mandatario a splica durante un encuentro cu prensa diamars mainta, ta pa e turistanan saca potret cu e anker y post e riba social media. E ta reconoce cu ta un proyecto chikito, pero sigur un proyecto cu tin un impacto grandi como atraccion pa nos turistanan. P’esey e proyecto ta cuadra tambe cu e maneho y e vision cu ta hibando den mehoracion di producto Aruba.

Pa e relato completo, lesa edicion di TREMPAN