Minister Maduro lo ta presente pa develacion di busto di Tino Ruiz

E siman aki Minister di Finansa ta biahando pa Bogota, Colombia, pa asina mira e trabounan di obra di arte di cual lo por mira riba rotonde di Sasaki. Pero tambe e lo ta presente p’e develacion di e busto di homenahe dje polis Tino Ruiz.

mr. Xiomara Maduro, Minister di Finansa, a indica durante rueda di prensa cu ora e ta eynan, su persona mes lo manda informacion riba e obra di arte di driekiel y e busto. Tambe tin otro obra di arte cu su persona lo papia riba nan despues. E tabatin un reunion prome y despues e lo papia cu e artista di e obra di arte publico.

BUSTO DI TINO RUIZ

Tino Ruiz tabata un agente policial cu a perde su bida durante un asistencia algun aña atras. Pa honra e agente aki, a traha un busto y esaki ta encarga p’e artista local Gilbert Senchi. E busto ta den su fase final y pa despues por manda esaki Aruba, unda cu lo pon’e dilanti di warda di Noord dilanti ex-Rio Grande.

OBRA DI ARTE DRIEKIEL

Un otro proyecto cu Gilbert Senchi y su team ta trahando riba dje pa Aruba ta e obra di arte di driekiel, cual proceso ta basta leu. Intencion ta pa pone e obra di arte aki riba un rotonde bashi di Avenida Nelson Orlando Oduber.

E plannan ta pa e obra aki t’ey na januari y asina ey prinses heredero di Hulanda, Catharina-Amalia, por haci e reapertura oficial.