Minister Maduro: Comercio ta mal educa en bes di informa pueblo

Aprobacion di e cambio di ley cu ta aumenta tarifa di BBO ta sigui su caminda. Minister di Finanzas, Xiomara Maduro a declara dialuna anochi cu coalicion ta riba mesun liña, a prepara tur ley, manda parlamento y lo yama reunion e siman aki. Fuera di esey a prepara comercio den diferente forma y pueblo tambe sa cu a fia placa y a yega ora pa paga Hulanda bek. Tambe a comenta cu BBO ta un ley diescinco aña bieu cu ta dirigi riba e omzet di negoshi y no riba e consumidor; y cu si ainda tin confusion of resistencia pa cu esaki, ta door cu comercio ta mal educa y mal informa comunidad. 

Pa loke ta trata e preocupacion cu gremio comercial ta sigui manifesta, Minister Maduro a splica cu e ley di BBO ta existi pa diescinco aña caba y pa’wo tur hende sa cu e ta un Belasting op Bedrijfsomzet y cu e no ta un consumentenbelasting.  “Ora ta trece cos dilanti,” refiriendo na declaracion di gremio comercial, “bo ta mal educa en bes di informa manera mester ta.” Adicionalmente e minister ta argumenta cu e echo cu e ley a wordo trata di cierto manera pa tur e añanan, no ta nifica cu ta esey ta e ley. “E ley ta duidelijk. Belasting of Bedrijfsomzetten,” e mandatario a bisa.

Minister Maduro ta convenci cu pueblo tambe sa cu Aruba ta den un situacion financiero precario y c unan (gobierno) a presta placa pa por tene comercio na bida, pa por tene cuponan di trabou y aworaki ta yega momento cu tin compromiso cu Hulanda. “Nos tin un realidad financiero cu nos tin cu paga bek,” el a bisa. E mandatario tin tur speransa cu e ley lo pasa pasobra Aruba tin un realidad financiero, a pasa un presupuesto y un cuadro financiero y aworaki mester haci cambi pa por cumpli cu e presupuesto ey.

Pa e relato completo, lesa edicion di TREMPAN