Minister Geoffrey Wever: Aruba Fair Trade Authority tin beneficio pa e consumidor

Dialuna den un openbare bijeenkomst den Parlamento di Aruba, Minister di Asuntonan Economico, mr. Geoffrey Wever, a presenta mas informacion y contesta pregunta di  e parlamentarionan den cuadro di e trayectorio di implementacion di e Aruba Fair Trade Authority (“AFTA”). 

Mayoria di pais desaroya rond di mundo ya tin un organo manera AFTA. Pa varios aña, e profesionalnan a conduci investigacion, a prepara ley cu Parlamento a aproba na 2020 y den cuadro di e reformanan economico, a pone implementacion di AFTA como prioridad. 

Segun e mandatario “cu e organo di AFTA, Aruba tambe ta forma parti di desaroyo internacional den a area aki. AFTA lo trece cambio importante y structural pa nos economia y pa tur ciudadano den nan rol como consumidor”. Minister Wever a informa di ta contento di por a logra ricibi sosten financiero for di Hulanda pa e implementacion AFTA. drs. Albert Scholten, kende ta lidera e implementacion di e autoridad a bin brinda su experticio riba e implementacion di AFTA como parti di e sosten di Hulanda.

Albert Scholten ta un experto internacional riba e area di competencia y a presenta kico AFTA lo nifica pa Aruba. Scholte ta subraya cu AFTA tin gran beneficio pa e consumidor, negoshi y economia.

Competencia liber y sin limitacion pa tur compania na un pais ta stimula inversion y desaroyo di comercio, tambe miho calidad di producto y servicio. Caminda por constata “prijs inhusto” pa via di abuso comercial – manera e.o. palabracion cu ta mara consumidornan sin ningun otro opcion – un Fair Trade Authority por tuma e encargo pa disolve dicho acuerdo, y tambe impone multa caminda necesario. Pues AFTA lo por contribui na prijs mas barata pa nos consumidornan.

E ley ta prescribi kico ta considera “Kartelvorming” manera den e ehempel menciona ariba, pero mescos ta proteha e consumidor tambe ta duna e comerciante e derecho di defende su mes, e mandatario a declara.

Aruba Fair Trade Authority ta un entidad completamente independiente di gobierno, minister Wever a informa. Scholten a informa cu e prome fase di AFTA lo enfoca riba brinda informacion na comunidad y comerciante. “Den proximo fasenan lo cuminsa introduci metodonan di control y ehecucion di AFTA su mandato”, Scholten a señala.