Minister Geoffrey Wever a scucha e trahadonan di Post Aruba N.V

Tin un inkietud y malcontento pa loke t’e trahadonan di Post Aruba NV pa loke ta cierto palabracion di CAO y aparentemente varios otro punto cu tin e empleadonan preocupa. P’e motibo ey nan a dicidi di welga.

Minister Geoffrey Wever, encarga cu asunto economico, transporte, comunicacion y desaroyo sostenibel , a comenta cu ta bon pa bin pa papia cu e trahadonan, scucha nan posicion y ta contento cu a haci esaki.

El a haya e empleadonan pafo hopi trankil. Nan a comparti nan preocupacion riba diferente nivel y cos cu segun nan no ta bayendo bon den e empresa. Cos cu nan lo kier mira diferente, reclamo cu nan tabatin. Tambe nan a bin cu peticion rib’e parti financiero y tabata bon pa compronde con e dinamica ta y pa scucha nan posicion.

E mandatario a sigui splica cu e kier pa ta envolvi pa busca un solucion. Tin cu sinta cu gerencia, Raad, mediador di gobierno y  sindicato. E ora pa por presenta un solucion p’e empleadonan di Post Aruba NV. Den e mesun rosea e mandatario a puntra pa nan bay bek trabao, esta para e welga p’asina e empresa no sigui haya mas daño ni tampoco perhudica e clientenan di post.

E clientenan tin comprension pa nan malcontento, p’e parti financiero, pero tambe mester tin p’e parti di e empresa y gobierno, cu Post Aruba NV ta un empresa cu ta den perdida y cu e situacion financiero no ta facil. E contribucion di pais Aruba ta 4 miyon florin pa aña pa Post. Ta un situacion cu pa hopi aña ta uno dificil. Un welga asina ta trece daño n’e mesun empresa y pa tur e clientenan di post, cu ta depende di servicio di Post.

E ora e mandatario a pidi e empleadonan den e encuentro cu nan pa nan reanuda trabao den tur trankilidad. A scucha nan posicion si, pero mester bay bek mesa pa por yega na un solucion. A pidi e empleadonan tempo p’e minister sinta cu tur partido y pa por presenta un plan, sin haci ningun promesa. Mester evalua tur e informacion, el a comenta.

E  PUNTONAN PREOCUPANTE

Minister Wever a agrega cu tabatin diferente preocupacion. E parti financiero ta hunga un rol grandi, tur hende tin e dificil, el a sigui splica. Despues cu a pasa den e pandemia tabatin momento financiero dificil pa tur e ciudadanonan y tambe p’e empleadonan di Post Aruba NV.

Esey t’e preocupacion principal, segun e minister. Ta mira cu costo di bida ta subi diariamente, como tambe awa, coriente y gasolin ta subi, cu ta fenomeno conoci cu ta afecta tur ciudadano y tambe e empleadonan di Post.