Minister Geoffrey Wever a reuni cu Camara di Comercio

Diahuebs 29 di september, a tuma luga e reunion mensual cu Camara di Comercio (KvK) hunto cu Minister di Asuntonan Economico, Comunicacion y Desaroyo Sostenibel, mr. Geoffrey Wever unda ta informa ariba e ultimo desaroyonan pa loke ta trata economia den su totalidad. Manteniendo laso estrecho cu e stakeholdernan clave pa asina guia nos economia den e bon direccion. 

Den e reunion mensual a trata e “Vestigingsbeleid” nobo cu a anuncia siman pasa y tambe diferente aspectonan cu ta toca e introduccion di aumento di BBO relaciona cu e reforma fiscal cu ta andando. Alabes a elabora ariba e punto cu entrante januari 2023 lo cuminsa cu e UBO-Register na Aruba. Esaki ta e ‘Ultimate Beneficial Owner Register” cu lo introduci pa asina sigura cu Aruba ta sigui cumpli cu recomendacionnan internacional di e Financial Action Task Force (FATF).

FATF ta un instancia internacional cu ta monitor actividad criminal di labamento di placa y financiamento di terrorismo y proliferacion. 

E ley concerni pa cu e introduccion di e UBO-Register a pasa parlamento algun luna atras y actualmente ta coordinando esaki conhuntamente cu Camara di Comercio pa defini e ultimo detayesnan prome cu e fecha di introduccion cu ta prome di Januari 2023.