Minister Dorothy Pietersz- Janga ta refutá kategórikamente e alegashonnan di Frakshon di PAR
Willemstad – Manera por a tuma nota den medionan di komunikashon e frakshon di PAR a indiká ku e no ta nota presensia di e minister di GMN kaminda tin diferente problema den salubridat. Minister Pietersz-Janga ta desmentí tur e puntonan ku frakshon di PAR a trese dilanti. Minister Pietersz- Janga ta indiká ku semper e tin oido pa tur partido tantu di koalishon komo di oposishon.
Dia 25 di yüli último, Minister Pietersz- Janga a tene un reunion ku parlamentario pa Partido PAR señora Ana- Maria Pauletta kaminda ku a papia ampliamente riba diferente puntonan den salubridat manera e situashon di dòkternan di wowo, kasnan di kuido, kon ta baha gastunan den kuido i finansiamentu di gastunan tambe pa e diferente institutonan i e trayektonan ku ta kanando.
No ta un sekreto tampoko pa frakshon di PAR ku gobièrnu aktual tin ku atendé ku e
”landenpakket”, kaminda ku lo mester bini diferente reforma den kuido ku ta tuma su tempu mirando ku esaki ta rekerí partisipashon di tur aktor den kuido.
Tambe no mester lubida ku den luna di aprel e komishon fiho di salubridat di Parlamento a pidi un reunion pa dia 2 di yüni. Parlamentu mes a kanselá e reunion aki. Minister Pietersz- Janga na su turno a puntra pa ki dia e reunion lo sigi pero te ainda no a risibí un kontesta.
Ta p’esey Minister Pieters- Janga ta lamentá ku frakshon di PAR ta trese atakenan asina aki riba su persona mirando e echo ku semper e ta kla i habrí pa duna informashon.
Por último Minister Pietersz- Janga ta indiká ku e ta sigi traha na bienestar di pueblo i ta kla pa duna tur informashon momentu ku esaki ta nesesario i solushoná problemanan den nos sektor di kuido.
