Minister di Naturalesa: Ta trahando riba un maneho unda por basha awa sushi

Aña pasa a bin dilanti un situacion na Safir unda un ciudadano a laga truck di awa pa basha awa sushi, pero a manda hopi mas. E habitantenan di e bario a keha dje holo desagradabel. P’esey gobierno ta trahando riba un beleid (maneho) unda por y no por basha awa sushi.

Ursell Arends, Minister di Naturalesa, a splica cu nan ta trahando awo riba un beleid unda por basha awa sushi. E ta un taskforce cu tin diferente departamento ta no solamente bou su ministerio, pero bou otro ministerio tambe, y ta formalisando un beleid. Asina ey e por ta duidelijk p’e companianan.

Tin cierto cos cu mester sa, por ehempel awa di laundry hopi bes ta haci p’e agricultornan. Pero tin cierto awa cu ora di colecta tin e grease den dje, esey ta algo devastador. Tin compania cu ta procesa e awa aki, pero tin persona cu ta haci mal uzo dje awa y tir’e. Nan ta uza e mesun truck cu nan a chica na hotel cu no tin un grease trap y ta busca awa di laundry, y asina ey ta contamina e awa.

E mandatario a indica cu nan ta trahando riba un maneho. Directie Natuur en Milieu (DNM), Santa Rosa, DOW, BCI y tur otro departamento ta trahando hunto riba e maneho. Dentro di poco nan lo finalis’e pa asina ey e tin claridad pa tur hende. BCI ta encarga pa reenforsa loke ta trata naturalesa. E departamento aki ta percura pa atende cu tur hende cu no ta cumpli cu e ley- y reglanan.