Minister di Finansa y Cultura: Gobierno ta traha riba loke ta realisabel den cuadro financiero

E gremionan comercial a indica cu nan ta bay entrega un plan di alternativo na gobierno pa reforma fiscal. Gobierno ta habri pa tende sugerencia, pero ta mira kico ta realisabel den cuadro financiero di Aruba.

mr. Xiomara Maduro, Minister di Finansa y Cultura, a indica cu gobierno semper ta habri pa tur sugerencia cu ta bini. Desde comienso tabatin sesion di stakeholder, unda gobierno a duna tur libertad pa por trece informacion den e tempo cu a transcuri. Por mira cu tin recomendacion cu gobierno a tuma. Awo a hinca eseynan den e leynan.

Sugerencia di gremio comercial ta bonbini te caminda cu gobierno por mira kico por haci cu nan. No por lubida algo principal, segun e mandatario. El a sigui indica cu Aruba tin un realidad financiero. E realidad financiero ta e cuadra den cual tin cu traha y ta duna kico ta e cosnan cu por cambia. Tambe con hopi por cambia nan y asina ey por introduci reforma fiscal, cambio fiscal.

Cuadra financiero ta keda, manera ta bisa na Hulandes, esun bepalend.

Tur loke gobierno por haci dentro di e realidad financiero ta hiba. A haci esey caba. Si tin sugerencia, segun Maduro, mas cu claro ta yama nan bonbini. Gobierno ta traha riba locual ta realisabel dentro di e cuadro financiero di pais Aruba.