ORANJESTAD – Minister di Salud Publico sr. Dangui Oduber ta contento di por anuncia cu e Banco Social di aseguradonan esta SVb a lansa un App pa nos pensionadonan. E portal di MiPensioen tabata disponibel caba desde aña 2019, na aña 2020 SVb a digitalisa henter nan proceso, awor den tempo corto ta lansa e tremendo App pa telefon mobil cu yama MiPensioen.
E mandatario a splica cu su vision ta pa brinda un servicio moderno na tur e aseguradonan por medio di innovacion y tecnologia. Cu e App aki SVb lo funciona na un manera mas eficiente treciendo aun mas tranparencia pa nos pensionadonan. SVb tin e deber pa administra e fondonan di e pensioen di biehes (Algemene Ouderdomsverzekering of AOV) adecuadamente y cu confiabilidad, pa mantene e fondonan financieramente sostenibel.
Minister Oduber a menciona cu segun e cifranan ricibi for di SVb, esakinan ta indica cu nos grandinan ta uza e portal di MiPensioen. Segun e cifranan na aña 2021 tabata tin 1054 persona cu a pidi pensioen di biehes di cual 922 a uza e portal pa haci esaki. Na aña 2022 (te cu augustus) 630 persona a pidi pa e pensioen y 609 a haci uzo di e portal. Esakinan ta indicadornan cu ta ilustra cu nos grandinan mas y mas ta uza tecnologia, por mira esaki tambe den graficanan segun e mandatario.
Danki na tecnologia y innovacion SVb por a yuda personanan cu ta biba den exterior pa keda cobra nan pensioen. Na 2021 SVb a yuda 543 persona via video calling, asina nan a prueba nan mes cu nan ta na bida, pa nan por keda cobra nan pensioen.
Minister Oduber ta informa cu e MiPensioen app ta bay haci posibel pa e asegurado wak su entradanan, tambe e por su jaaropgaaf y download esaki pa impuesto, tur esaki den bo planti man. Te cu awor esakinan bo por haci, pero e idea ta pa sigui expande e app pa e por tin mas uzo den futuro.
E pensionado por registra via website of download e app di biaha. Locual mester ta un email address y bo code di AOV. Via e website of via e app e pensionado lo wordo splica stap pa stap con tur cos ta traha.
E mandatario ta felicita e director di SVb sr. Edwin Jacobs y henter e team cu a traha duro pa haci e app MiPensioen un realidad. Minister Dangui Oduber ta contento di con e vision di SVb ta bayendo, tur cos ta canando segun plan. E mandatario a trece dilanti cu e innovacion di e app sigur lo trece un mehoracion den e servicio cu SVb ta duna y alaves lo facilita nos pesionadonan.
———————
Minister Dangui Oduber
AWE A ANUNCIA AUMENTO DI UITKERING PENSIOEN DI BIEHES
ORANJESTAD – Awe Minister Dangui Oduber a anuncia aumento di uitkering di pensioen di biehes. Aña 2020 y aña 2021 tawata e añanan di mas dificil den historia di nos pais. E pandemia a pone retonan grandi nos dilanti como pais pero hunto den union pais Aruba a surpasa tur. Ora nos a kere cu situacion lo bira miho e guera na Ukraina a cuminsa y esaki a conduci na inflacion rond mundo y factornan externo cu tin hopi influencia riba Aruba.
Como e Minister encarga cu SVb, naturalmente tin cu pensa riba nos grandinan y con pa yuda nan den e presion cu inflacion a trece cune pa nan.
No obstante tur e retonan di aña 2022, e aña aki ta uno excepcional pa nos turismo y economia. E recuperacion rapido di nos turismo y economia ta bayendo bon.
- Nos ta surpasando nivelnan di aña 2019 cual tawata un di e mihor añanan pa pais Aruba. Nos economia lo crece cu double digits e aña aki.
- E prome kwartaal banco central a publica cu Aruba su economia a crece cu 16.2%.
- Primanan ricibi pa e prome 6 lunanan di e aña aki, a conoce un aumento di 12.2%.
Tur esaki a conduci cu tin espacio pa ahusta uitkering di pensioen di biehes.
Ta en espera di e cifranan oficial di CBS pa loke ta inflacion pero a tuma e decision caba pa adapta e pensioen di behes entrante 1 di januari 2023 cu minimo 3%. Segun ley, gobierno por adapta e pensioen cu maximo di e aumento den indice di prijs di consumo midi di 1 di sept 2021 pa 31 di aug 2022.
Proyeccion di SVb ta cu e indice di prijs durante e periodo menciona lo ta entre 4.1 pa 5.4%. Na e momentonan aki por indica cu lo ta responsabel un aumento di minimo di 3%. Si e desaroyo den e fondo mehora mas ainda, lo por aumenta algo mas.
