Minister Dangui Oduber a ricibi bishita di The Caribbean Med Labs

Diaranson mainta Minister di Turismo y Salud Publico Dangui Oduber a ricibi bishita di The Caribbean Med Labs Foundation. E fundacion aki ta un un organisacion no gubernamental, estableci na Trinidad and Tobago. Nan ta traha pa construi y sostene servicio laboratorio di e calidadnan di mas halto a traves di un mecanismo independiente auto-suficiente.

Den e reunion aki Caribbean Medlabs a informa e mandatario riba e resultado di e dos dianan di bishita cu a tuma luga na Aruba, caminda nan a bishita diferente laboratorio.

E colaboracion entre Gobierno y The Caribbean Med Labs a cuminsa na aña 2019. Den esaki nan ta comprometi pa asisti Aruba den yuda sigura y standarisa un bon calidad di test cu ta ehecuta p’e laboratorionan na Aruba. The Caribbean Med Labs a duna elogio n’e calidad di e testnan cu ta brinda actualmente p’e diferente laboratorionan. E parti cu mas nan a elogia t’e acreditacion internacional cu ya caba varios laboratorionan na Aruba tin. 

Otro tema importante cu The Caribbean Med Labs a trece padilanti ta e rol importante di un laboratorio, no solamente pa cu salubridad publico den aspecto local pero tambe turistico. Minister Oduber  lo sigui coopera cu Caribbean Medlab pa asisti den e desaroyo di nos calidad di laboratorio aki na Aruba y garantisa cu tur test cu haci ta confiabel p’e laboratorionan cu ta acredita, certifica y di calidad.