Durante reunion den Parlamento Minister di Transporte, Integridad, Naturalesa y Adultonan Mayor a presenta ful e trayecto cu a yega na e decision pa e cambionan di maneho den otorgacion di permiso di taxi.
Na 2021 Minister Arends a bin topa un maneho cu varios loopholes cu tabata hacie un proceso cu por ta comprometi. Desde 2022 a cuminsa implementa e cambionan unda Minister Arends a revoca e maneho di ex-Minister Romero, y a introduci un maneho mas stricto. Tambe a cuminsa e digitalisacion di e proceso di peticion di permiso via BID. Fin di 2023 esaki tabata cla pa cuminsa cu e inventarisacion di esunnan cu den pasado a yega di aplica pa permiso di taxi, incluyendo hulp chauffeur. Y a base di fecha di peticion, pues FIFO(first-in-first-out) e permisonan cu ta bira disponibel ta otorga.
Awo cu Minister Arends a percura pa un sistema transparente, e siguiente paso tabata pa informa y publica e lista di esunnan cu a haci e peticion. Awe, e lista completo di esunnan cu ta den pipeline pa ricibi permiso di taxi, basa riba zaaknummer, ta riba Publico.aw den e tab di permiso.
Un di prioridadnan clave pa maneho di Transporte Publico ta integridad, siguridad y oportunidad igual den e sistema. Cu publicacion di e lista, Minister Arends ta reafirma su dedicacion pa gobernacion husto, transparencia den e aparato publico y cu principio di oportunidad igual den e proceso pa otorga permiso di taxi. Den un contesta directo na e pregunta- y preocupacionnan di miembro di Parlamento, Minister Arends a enfatisa cu e cambio di maneho ta pa sigura primordialmente na sirbi pueblo, conforme ley y sin faboritismo.
Cu otorgacion ta sosode durante eleccion ta simplemente casualidad mirando cu e proceso a cana su caminda manera debe ser, y eleccion mester a tuma luga na 2025. Pues un no tin di haber cu e otro. E cambio significante den e otorgacionnan aki ta e aspecto di transparencia di e henter e proceso cu a bin ta tumando luga en bes di otorgacion basa riba patronahe politico.
Minister Arends a enfatisa cu Parlamento tin un responsabilidad pa proteha e interes di pueblo y no pa mantene sistemanan cu ta alimenta corupcion.
Comment