Minister Arends: Tarea nobo p’e trahadonan di dump pronto lo bira conoci

E topico di e personal di Serlimar tambe a bin dilanti durante e conferencia di prensa cu Minister di Naturalesa, Ursell Arends a ofrece diahuebs mainta. Un biaha mas, e mandatario a sigura cu proceso ey ta avansando den coordinacion cu e sindicato cu ta representa nan y cu nunca tabata trata di un cuestion di empleo, pero mas bien di e descripcion nobo di nan funcion.

E mandatario a splica na periodista di matutino local cu diaranson ultimo a entrega e descripcion di trabou na sindicato SEPPA, mientras cu diahuebs atardi nan tabata riba schedule pa entrega kico ta nan tarea nobo. A compila algo despues di a papia cu gerencia y hunta di Serlimar. “E trahadonan aki lo bay keda eynan pa yuda nos remedia e area,” asina Arends a declara. 

E titular encarga cu e departamento di recoleccion di sushi a bisa di ta sigur cu lo haya full colaboracion di e trahadonan mirando cu mayoria tin un trayectoria, conocemento y sa kico tur tin na e areanan aki. Arends: “Mi ta conta cu nan colaboracion y nan experticio cu hunto nos por sanea e area aki. Esey ta e meta.” E ta sinti cu e sindicato ta habri tambe y e trahadornan lo duna tur e colaboracion. “Tur cos pa Aruba.”