Minister Arends: Pa garantisa siguridad den aviacion ta necesario un sistema sostenibel

Den luna di september, e trabounan pa loke ta trata evaluacion di cumplimento den sector di aviacion di Aruba a cuminsa. E team di ICAO (Organization Internacional di Aviacion Civil) a tene diferente sesionnan extensivo pa repasa tur e leynan, procesonan actual di aviacion civil, pa cuminsa identifica puntonan di mehoracion. 

Manera ya caba a bin ta comunica, e meta ta pa Aruba bira lider den aviacion den Caribe. Pa logra esaki, ministerio di transporte, hunto cu Departamento di Aviacion Civil di Aruba (Directie Luchtvaart) a compromete pa tuma pasonan pa incrementa e nivel di cumplimento cu standardnan di ICAO. 

Despues di 5 dia intensivo unda e expertonan di ICAO y tambe e team di Directie Luchtvaart di Aruba, a cuminsa pasa door di tur e leynan y procesonan cu ta resorta bou di Directie Luchtvaart pero tambe den cooperacion cu ANSA y aeropuerto. Nan a atende cu p.e. asuntonan di certificacion y vigilancia di aeropuerto, nabegacion aereo y operacionnan di vuelo y licencia, dunando guia y asistencia den cada un di e temanan menciona.

Na final di e siman, minister Arends a haci un bishita na Directie Luchtvaart unda a sera conoci cu e team di ICAO pa asina haya un resumen di con e evaluacion ta bayendo y con e team ta mira cu Aruba ta posiciona pa cu un posibel ‘audit’ cu lo por ta tumando luga otro aña. 

E team di ICAO a segura minister cu nan ta sumamente positivo pa con e proceso ta andando y specialmente contento cu e team di profesionalnan den e sector cu ta traha cu dedicacion pa hunto hisa Aruba su nivel di siguridad di aviacion civil. Nan ta admira e compromiso cu Directie Luchtvaart tin pa implementa un sistema cu ta cumpli cu standardnan internacional di aviacion. 

Un cos ta pa implementa e sistema, y otro cos ta pa sostene e sistema

Un punto di mehoracion cu a wordo menciona ta e sostenibilidad di e sistema cu lo tincu wordo desaroya y implementa. Esaki no por pasa solamente pa e audit pero ta encera mantenemento tambe. ICAO su team ta remarca cu pa mantene e standardnan aki, Directie Luchtvaart ta rekeri recursonan financiero como tambe recurso humano. Trainingnan cu lo mester tuma luga y cu ta tuma hopi tempo, p’esey ta di suma importancia pa inverti den profesionalnan cu tin e capacidad pero tambe pa retene e profesional nan aki, pa asina por sostene e sistema.  Otro puntonan di atencion ta regulacionnan, guianan di siguridad cu mester wordo ahusta y tambe legislacionan cu mester wordo reenforsa.

E posibel ‘audit’ cu lo ta tumando luga, ta aporta na hisa Aruba su clasificacion internacional na uno mas halto, esaki ta habri oportunidad economico den e sector di aviacion. Oportunidadnan cu ya for di basta tempo caba tin e potencial pa utilisa na beneficio di Aruba su sector di aviacion.