Minister Arends: Hunto nos ta yuda Aruba su naturalesa recupera

Durante weekend ultimo minister di naturalesa, Ursell Arends a lanta y bay planta pa duna su contribucion na e proyecto di Ban Lanta y Planta. E fundacion tin como meta pa planta 10.000 mata rond di Aruba pa yuda restaura Aruba su ecosistema natural.

Un tremendo iniciativa cu ta promove Aruba su matanan nativo y nos flora y fauna en general. A planta e matanan na un manera unda ta percura cu ora muha e mata atardi, e awa ta yega e reis directo y asina yuda e mata crece na un manera sostenibel. Tambe e fundacion tin un schedule unda e boluntarionan por yuda cu muhamento di e matanan, tres biaha pa siman. Esaki ta un manera eficiente pa por percura pa e matanan cu planta, por sobrevivi den e clima cayente di Aruba.

“E ta un placer pa tabatatin e oportunidad pa pasa un mainta den naturalesa, unda ta duna balor na nos matanan nativo di Aruba y balor pa nos medio ambiente.” Minister Arends a cuminsa ta bisa, “Pasobra ora naturalesa prospera, nos como ser humano tambe ta prospera.”

Minister Arends ta manda palabra di gradicimento y admiracion na e fundacion y su team completo, como tambe tur boluntario cu ta asisti den solo cayente. Pa mas informacion con pa bira boluntario por contacta e fundacion “Ban Lanta y Planta” via nan medianan social. Hunto nos ta yuda Aruba su naturalesa recupera y mitiga e efectonan di cambio climatico.