Minister Ady Thijsen ta contento: Ban enfoca awo riba presupuesto 2023

“Hopi bon, mi ta contento”, asina Minister Plenipotenciario di Aruba na Hulanda, mr. Juan “Ady” Thijsen, a bisa na salida di e reunion di Conseho di Minister di Reino Hulandes. Ey el a tende cu Gobierno di Hulanda ta satisfecho cu e adaptacion cu Minister di Finansa di Aruba a haci den presupuesto 2022 ainda y no ta mira necesidad pa duna un “aanwijzing” mas.

Pero e actual Minister Plenipotenciario a corda prensa presente cu durante henter e trayectorio el a keda riba e mesun liña di pensamento y a contesta semper mesun cos. “Nos ta keda positivo. Tin diferencia di opinion, pero esey ta normal. Hulanda a duna espacio y nos a haya necesario pa splica otro e diferencianan y esey a wordi haci. Mi ta hopi contento cu nan a compronde esey. Awo ban enfoca riba aña 2023”.

Mas leu, e representante di Gobierno di Aruba na Hulanda a enfatisa cu e ta convenci cu Gabinete Wever-Croes II lo logra den presupuesto 2023. El a argumenta cu, for di 2017 caba ta manehando finansa publico den forma delingente y cu na 2020 mester tabatin un surplus, pero e pandemia a yega mal momento. “Pero un punto ta importante pa tur hende sa y mi ta kere cu esey a convence nan tambe. Con un pais manera Aruba, cu a bay plat door di e pandemia, mester a fia tanto miyones for di Hulanda, nos a baha 1028 miyon den tres aña pa 25 miyon so di deficit. Pues ta un trabou grandi e gobierno a haci”, segun Ady Thijsen a splica despues di e Reunion di Conseho di Minister di Reino Hulandes.

Otro aña Gabinete Wever-Croes mester presenta un surplus den presupuesto y e palabra “deficit” lo mester sali for di e vocabulario politico di Aruba. Desde awo padilanti, tur aña mester percura cu entrada di pais Aruba ta mas halto cu e gastonan, loke pa ultimo decada no a logra di forma permanente. Pero mirando con turismo ta creciendi bek y sin conta otro recursonan di entrada cu por surgi ainda den e lunanan nos dilanti, cu Thijsen ta premira cu otro aña nos lo logra cumpli tambe.

“P’esey mi ta positivo, mi ta felicita Gobierno di Aruba, ta gradici Gobierno di Hulanda, na Rijksministerraad, pa mustra cu hunto nos ta traha serio y cu nos por yega na decisionnan sano.”