Mike Eman: Madiki ta cla p’e cambio

Partido AVP ta continua cu bishita y reunionnan den bario pa asina comparti e vision di e BON COMUN cu nos comunidad. E encuentro cu ciudadanonan di Madiki Kavel y vecindario a culmina cu un encuentro di bario na cas di famia Roy Leyba. E bario di Madiki Kavel a responde riba e yamada di partido AVP. Ciudadanonan di Madiki Kavel a bini hunto y a expresa nan preocupacion cu e rumbo di nos pais y e situacion cu mas y mas famia ta cay aden. 

Den bario di Madiki Kavel, mescos cu e otro barionan ta resalta e problemanan social cu ta aumentando, e pobresa cu ta creciendo, e falta di perspectiva cu ta bira mucho comun. Mas y mas cas tin cu lucha pa por paga pa cuminda, pa electricidad y awa pa esaki no wordo desconecta. Mas y mas ta ripara cu hunto cu esunnan cu salarionan mas abao y pensionadonan, mas hende ta hopi preocupa cu e aumento cruel di costo di bida y ta haci e pregunta ta con nan tin cu biba. 

Lider di partido Mike Eman, parlamentario, Arthur Dowers, Mervin Wyatt Ras, yiu di e bario Benny Sevinger acompaña pa coleganan di partido Wendrick Cicilia, Clifford Heiliger, Dennerich Kelly, Sandra Heymering, Connie Conner y Juni Croes. Hunto cu un team di hobennan, di e Think Common Good a bishita bario y tanto na casnan como den e encuentro a scucha ciudadanonan y a comparti pensamento di cambio pa miho manera a conoce semper bou gobierno di AVP.

Tur caminda ta scucha e deseo cu Aruba mester di un cambio y un vision distinto enfoca ariba e BON COMUN. Den e concepto aki e decisionnan di gobernantenan mester sirbi e BON COMUN. E concepto di BON COMUN lo por wordo realisa cu un vision di rescate pa Aruba y liderazgo y team pa realisa esaki. E trayectoria di logronan na fabor di. Pueblo di partido AVP, ta evidencia cu un pais ta desaroya na momento cu su gobernantenan ta wordo inspira pe concepto di e BON COMUN.