Mike Eman (AVP): Si mayornan no tin pa schoolgeld port’i scol lo cera p’e mucha- y hobennan

Lider di fraccion di AVP den Parlamento, Mike Eman, durante di reunion publico dialuna mainta,  a enfatisa riba e situacion cu e pensionado- y e trahadonan cu salario minimo, ta pasando aden cu aumento drastico di costo di bida, pa cual gobierno actual no tin atencion.

“Lamentablemente awe, e concepto y consenshi , cu esunnan mas vulnerabel den e pais, esunnan cu ta biba riba bijstand, pensionadonan, esunnan riba un salario minimo, tur y mas di 50 mil ciudadano, ta sufriendo n’e momentonan aki den un pobresa penoso.

Un  pobresa cu a inicia na 2017 y e cifranan di Centraal Bureau Statistiek,  ta marca claramente cu esey tabata e momento cu cosnan a cuminsa cambia den e pais aki, pa esunnan mas vulnerabel.
Esaki ta un sociedad cu los di cualkier partido politico, los di cualkier gobernacion cu decada atras a realisa cu mester tin ley laboral  pa proteha empleadonan,  pa nan no traha mas cu 8 ora y pa nan tin un dia liber.

Awe lamentablemente nos empleadonan tin cu traha dos trabou  pa placa por yega pa nan pone pan riba mesa pa nan famia. Esaki ta e pais cu a crea ley pa proteha esunnan cu no tin placa, pa bay dokter, pa paga pa remedi y a introduci un AZV pa tur hende riba e pais aki pa nan tin siguransa cu nan tin cuido medico.

Awe e concepto aki di cuida esunnan mas vulnerabel den e pais, pa paga pa nan salud, esaki ta destrosa paso a paso y awe tin hende grandi ta yega na botica cu cinco remedi cu pa hopi aña nan tin prescribi, nan ta haya tende cu tres ta paga pa AZV y cu dos no mas.

Un pensionado kende apenas tin suficiente placa pa por paga pa tur otro necesidad, ta hay’e awe ta laga dos remedi atras haciendo un daño enormemente grandi na su salud.

Esaki ta e pais cu a crea enseñansa publico, pa tur mucha por bay scol, esaki ta e pais cu a crea subsidio pa scol, bijzonderescholen, SKOA ta haya subsidio pa asina nos muchanan por bay scol.

Awe ta resulta cu si mayornan no tin 200, 300, 400, 500 florin pa paga schoolgeld, porta di scol ta cera pa e mucha- y hobennan aki. E decadencia aki a inicia na 2017, caminda na 2017 gobierno a cambia prioridad di e pais aki, di sirbi e bon comun, pa bay sirbi interes particular, interes otro, aheno n’e interes general di e pais  y di pueblo  aki.

Cuanto mayor n’e momentonan aki, tin dificultad enormemente grandi pa por cera e placa pa por yega n’e suma cu mester pa paga schoolgeld pa asina e muchanan por bay scol, cu ta un situacion di lamenta profusamente,”  lider di fraccion di AVP, Mike mustra dialuna mainta den Parlamento.