Mike Eman (AVP): Medida devastador imponi pa Gabinete Wever-Croes

“Cu un ley cu a wordo aproba ayera (diaranson) nochi door di e fraccionnan di MEP y RAIZ den Parlamento di Aruba, tur hende na Aruba, tur negoshi na Aruba ta bay wordo afecta severamente. E ley aki di Gabinete Wever Croes yama “PLAN DI BELASTING 2023”, pero en realidad e ta un PAKETE DI MEDIDA. E ta encera e pio medidanan cu nos pais a yega di conoce den hopi tempo”, esey tabata e prome reaccion di Lider di Oposicion, mr. Mike Eman despues di a bataya te cu 1:00 am contra di pakete di medida aki.  

E fraccionnan MEP/RAIZ a nenga di invita e sindicato- y e organisacionnan comercial pa scucha nan opinion tocante e ley aki y su consecuencianan. Asina mes diferente organisacion a analisa e pakete di medidanan den e ley aki y a duna nan consehonan. Tur conseho y advertencia na Gabinete Wever-Croes tabata serio, cu desaprobacion fuerte p’e medidanan den e ley y cu un apelacion urgente na gobierno pa no trata e ley aki. 

Fraccion di AVP a insisti pa scucha e gremionan, pero sin nimgun forma di dialogo, MEP y RAIZ a aproba pa di cinco aña consecutivo un pakete di medida pisa. Loke ta haci e pakete aki diferente cu tur e otro añanan, t’e cantidad di medida pa tur hende y tur sector di nos economia. Tambe e consecuencianan di e medidanan aki lo ta mas severo pa henter pueblo: tur hende ta bay atras, e negoshinan chikito lo tin mas problema pa keda habri, Aruba ta bay bira hopi mas caro p’e turistanan, mientras cu ta kita di e placa cu tin disponibel pa haci mercadeo pa Aruba den exterior. 

Fraccion di AVP a adverti gobierno y e partidonan MEP y RAIZ, cu e medidanan aki ta bay causa mas pobresa; cu nan lo pone specialmente e companianan mediano y chikito bou hopi pression financiero y cu peliger pa sera nan negoshi; y ora negoshinan sera hopi hende lo perde trabou y cu e medidanan nobo aki di MEP y RAIZ lo haci Aruba menos atractivo p’e turistanan y e inversionistanan. Pero mas cu tur fraccion di AVP a mustra cu e cifranan oficial di departamentonan di gobierno mes, cu specialmente e mas cu 50 mil hende cu ta gana un salario menos di 3000 florin pa luna, e pensionadonan cu un pensioen di gobierno/SVb, e trahadonan cu ta traha riba nan mes y e ciudadanonan cu ta haya un onderstand, tur lo bay ainda mas atras den nan forsa di compra! Partido AVP a calcula cu ta mas cu 50.000 hende lo ta seriamente afecta door di e medidanan aki di MEP y RAIZ cu e peliger grandi cu mas hende lo cay den pobresa!

Pa preveni esaki fraccion di AVP a presenta un amienda durante di e reunion publico cu a ensera un catidad di proposicion pa evita e medidanan di Gabinete Wever-Croes y pa duna un alivio na pueblo, entre nan proposicionnan pa aumenta reparatietoeslag p’e empleadonan na 300 florin pa luna y tambe pa pensionado, weduwen en wezen y bijstandtrekkers. Pero Fraccion di MEP y RAIZ a vota contra di e amienda di fraccion di AVP.