Mike De Meza (AVP): Total di shete director y bintidos miembro di raad kita di trabou

Tur e trabou cu Gabinete Mike Eman I y II a ehecuta, demas di tur otro trabou di preparacion haci pa continuacion, riba e ramo di energia berde lastimamente a keda frustra, para y/of destrui principalmente na man di prome minister Evelyn Wever-Croes. 

Pueblo por mira con un structura di maneho responsabel y transparente pa garantisa produccion y suministracion di energia ta keda manipula y destrui pa e dos partidonan MEP y RAIZ den gobernacion. E unico conclusion cu por saca como motivacion aki ta cu tin un sed pa poder y hamber pa enrikecimento di Friends & Family.

Durante 5 aña bou gabinete Wever-Croes a kita y/of reemplasa dos (2) director di utilities Aruba NV, tres (3) director di WEB Aruba NV, dos (2) director di NV Elmar Aruba y tambe un total di 22 miembro di e conseho di comisario (RvC) di Utilities, WEB y Elmar. Esaki claramente ta prueba y indicacion di un maneho adhoc, sin vision y deficiente di gabinete MEP-RAIZ.

Un berguensa grandi pa mira con e dos ministernan – Evelyn Wever-Croes y Glenbert Croes cu sosten di fraccion di MEP y RAIZ:

 “No tin ningun aprecio y balor pa nos profesionalnan Arubiano” 

Esaki ta un falta di respet total pa tur e trahadonan den nos companianan estatal y ful e pueblo di Aruba. 

Pueblo mester realisa cu nos companianan estatal mester ta respeta y protegi contra di abuso politico. Ta inaceptabel cu e ministernan di MEP y RAIZ por kere cu nan por kita profesionalnan for di posicion clave y di vital importancia pa economia di nos pais, pa despues gewoon pone famia sin educacion alguno y/of experencia al caso den e posicionnan aki. 

Esaki ya ta causando un desaster den nos pais. E tipo di actuacion aki door di gobernante mester ta mira y trata como gobernante terorista! 

E actonan aki ta contra e interes general y ta demotivante pa tur e profesionalnan na Aruba. Esaki tambe ta un di e causanan cu hopi di nos hobennan Arubiano no kier regresa nos pais.

Un gabinete di MEP-RAIZ cu ya no tin NINGUN clase di autoridad moral. Un gabinete cu un falta di sentido propio pa goberna nos pais riba un manera responsabel y digno. Kico mas por spera di e gabinete MEP y RAIZ?