Mike de Meza (AVP): Hende no por carga costo di bida mas

“Despues di ocho luna cu por fin e reunion aki ta yama, a confronta e gobierno cu diferente pregunta y preocupacion cu tin den pueblo,” ta loke cu parlamentario Mike de Meza, di e fraccion di AVP a indica.

Dialuna tabatin un reunion publico den parlamento caminda cu a trata costo di bida di nos pueblo y naturalmente e fraccion berde tabatin su punto di bista riba esaki.

De Meza ta sigui splica cu tur hende sa cu e costo di bida ta incargabel. Pa hopi hende nan no por cumpli cu nan debernan financiero mensual mas. Por mira hopi tata y mama di famia, ora cu topa nan den comunidad nan ta bisa cu hopi tristesa, cu e costo di bida a bira hopi halto y dialuna a duna como ilustracion, por ehempel, aumenta e BBOnan di 3.5% bay te 7%. Esaki ta nifica cu den seis aña a cobra mas di un biyon (mil miyon) florin na solamente e medida di BBO, cual ta algo cu ta hamas bisto.

Riba dje tin e otro costonan cu a aumenta. Por a mira prijs di gasolin, diesel y kerosin. Ta prijs cu ta fiha riba mercado mundial y no tin influencia riba dje. Loke si tin influencia riba dje ta por ehempel si ta aumenta of baha e accijns. Por a mira cu entrada di gabinete Wever-Croes I, inmediatamente a recuri na aumenta e accijns riba  combustibel cu 10 cen, cual ta mas of menos 12 miyon florin.

Esey ta nifica cu 70 miyon florin durante 5 aña y mey pa 6 aña pa cobra pueblo.  Tambe tin dos schakel di BBO/BAZV etc. cu ora e prijs mundial aumenta, automaticamente esey ta extra entrada pa gobierno cu ta innecesario. Esey den pasado a trece esaki na atencion na gobierno. Pasobra esey tambe ta 70 miyon adicional cu ta cobrando pueblo. Ta decision cu gobierno tin cu tuma, cu e por tuma cual ta los cu pasa riba mercado internacional.

Pa mas detaye lesa TREMPAN.