Mike de Meza (AVP): Diesel no por ta mas caro cu gasolin!

Diamars Minister di Asuntonan Economico a anuncia reduccion di prijs di gasolin y diesel pa e luna aki, pero su tras a alerta pueblo mesora cu ta nota un tendencia mundial di aumento den prijs! Notabel ta cu e luna ‘ki diesel ta un tiki mas caro compara cu gasolin. Mirando e batayanan internacional, tin posibilidad cu prijs di crudo lo sigui aumenta.

Parlamentario di AVP, ing. Mike de Meza, a indica cu, segun su conocemento di e materia, tin chens cu e prijs por aumenta. Den e ultimo dianan por a nota cu e dos tipo di crudo conoci internacionalmente, cu ta un marca Europeo y otro Mericano, ta aumentando un bes mas. Por a mira ultimo ‘ki cu prijs dje crudo di e marca Europeo ta 96 pa 98 dollar pa bari y awo e ta banda di 90 dollar. E dianan cu a pasa, por a nota cu crudo Mericano a surpasa 90 dollar. Esey ta nifica cu e prijs ta fluctua hopi y mester ten’e den consideracion cu e por aumenta cualkier momento. E ta hopi instabiel!

DIESEL TA MAS CARO CU GASOLIN

Ta conoci cu aki na Aruba prijs di diesel ta bou di gasolin, pero despues di e anuncio di diamars, esaki ta mas halto. Tur tempo esunnan cu tin plach’i number di diesel ta paga mas hopi cu esunnan di gasolin. Mike de Meza ta kere cu mester bay den direccion di baha nan prijs, pero tambe mester mira kico pa haci cu accijns. Na momento cu prijs di diesel y gasolin ta halto, gobierno ta cobra un accijns mas halto compara cu normal.

MATA ECONOMIA

E cambionan den prijs tin hopi di haber cu suministro y demanda (supply & demand). Aki ta depende kico ta e suministro di producto y kico ta e demanda mundialmente. Por mira cu diesel a aumenta pa motibo cu e demanda mundial a crece. Esey ta un efecto internacional cu mester deal cu ne y localmente tin di mira economia lora manera debe ser.

CONSULTA CU WEB Mike de Meza ta kere cu Minister di Energia, Glenbert Croes, lo pasa su tempo hopi mas miho si e consulta cu e expertonan di WEB. Asina aki e por mira kico pa haci, entre otro, pa sigui aumenta sistema di eficiencia cu tin.