Mike de Meza (AVP): Cumpra crudo barata por causa instabilidad operacional na WEB

Desde cu minister Glenbert Croes a anuncia su biahe pa Ecuador, unda ta bay busca crudo inferior. VWI a trece su preocupacion riba esaki pasobra crudo barata por daña motor. AVP a mustra su preocupacion tambe riba e punto aki.

ing. Mike de Meza, parlamentario di AVP, a splica cu WEB tin e aparatonan RECIPnan. Esakinan ta aparato hopi mas eficiente compara cu e sistema convencional di e boilers cu tin. Un firebox caminda cu tin un tiki mas di flexibilidad, pero hasta eynan mester tene cuidou di ki tipo di fuel oil ta uza. Mester ta hopi cauteloso cu e RECIPnan. E fuel oil cu ta uza eynan, tin un rekisito di calidad. Mester tin e fuel oil ey p’asina por procesa den e RECIPnan cu tin na WEB pa no bay causa daño, causa mantencion extra y ta bay haya ‘down time’ cu ta bay causa por ehempel blackout.

E ta haya cu mester ta hopi cauteloso, pasobra fuel oil ta un di e productonan mas pisa cu tin. Den e fuel oil hopi biaha tin metal agresivo, tin acido den dje. Tambe tin otro parti cu ta causa erosion y corosion den e sistema. De Meza a splica cu e plantanan ey ta traha c’un specificacion particular cu tin di wanta na dje. VWI tin rason, pasobra mester tene cuidou cu kico ta bezig cu ne.

Si kier bay busca un fuel oil mas barata, na fin di dia e ta sali mas caro. E ta causa mucho mas problema. E ta bay ta un kapitaalvernietiging p’e inversion haci den e ekiponan, pasobra na fin di dia ta destrui e ekiponan ey. Asina ey ta bay causa instabilidad di operacion den e plantanan den WEB. E parlamentario ta enfatisa cu mester ta cauteloso cu ne. P’esey e ta haya un lastima cu e minister a bay Ecuador pa papia di fuel oil, pero ta mira un consehero di dje, ex-minister Edison Briesen, y e director di Utilities N.V. Anthony Rojer, cu no tin ningun conocemento riba e materia aki. Pero e no a bay cu e expertonan mes di WEB.