Mike de Meza (AVP): Acuerdo pa suministracion di LNG ta desbentahoso pa Aruba

E direccion iresponsabel bou maneho y autoridad di minister Glenbert Croes cu ta cana via instruccion na Utilities y ta imponi riba WEB ta creando hopi precoupacion. Na varios ocasion, fraccion di AVP a indica cu tin varios cosn eroneo ta tuma luga bou di maneho di e minister y ta yega te den WEB. 

Awo por a mira cu e precupacion a bira asina grandi cu hasta e trahadonan di WEB mes ta bati alarma publicamente. E precupacion ta asina grandi y urgente cu trahadonan di WEB publicamente a anuncia di ta distancia nan mes for di e maneho hopi deficiente di Utilities y e minister. 

Tin hasta pensamento y indicacion cu aki por papia di maneho maligno intencional. Ta di condena pa mira un situacion asina toxico cu ta reina den e companianan di utilidad estatal. Locual ta hopi remarcabel ta cu e maneho desastroso di Minister Glenbert Croes keto bay ta gosa di e sosten di ful e conseho di minister y tambe di e fraccionan di MEP y RAIZ. Pero hopi hende no ta realisa cu e intervencion politico constantemente di minister Glenbert Croes ta causando un “total meltdown” den WEB, cu lo tin su consecuencia grave y lo afecta hasta e bida socio-economico den ful nos pais. Henter nos economia ta den peliger na momento cu ministernan ta interferi politicamente sin base, sin argumente y sin un vision. 

Por tuma ehempel for di e decisionnan eroneo riba RdA den diferente caso caminda Prome Minister Evelyn Wever-Croes a kibra contract cu Citgo caminda economia di Aruba a perde un contribucion anual di 600 miyon pa aña,150 miyon directo y indirecto den caha di gobierno, anto hasta e compania RDA mes a perde un entrada substancial di 35 miyon florin anualmente.

Lamentabel tambe ta cu bou maneho di Promer Minister Wever-Croes a hasta regala Citgo un suma di 320 miyon florin. Te cu dia di awe no tin ningun direccion pa cu e refineria di Aruba, caminda e situacion riba e tereno di refineria ta birando un peliger masha grandi. E gobierno actual a fracasa totalmente den buskeda pa operador pa e terminal pa transshipment y despues tambe a fracasa pa haya un operador pa e refineria di Aruba. Tambe pueblo por corda con henter e proyecto masha dudoso di LNG a cana, caminda ningun hende a haya pa lesa e contract cu tin un duracion di 20 aña largo y un balor di mas di 3 BIYON florin. Lastimamente, WEB bou instruccion di Utilities, cu ta cay bou responsabilidad di Minister Glenbert Croes, a firma un acuerdo pa suministracion di LNG sumamente desbentahoso pa Aruba den tur sentido di palabra. Tambe nos por corda mas recien ora cu a tuma e decision desfaborabel caminda via instruccion di Utilities cu WEB no tabata tin mag di hedge e prijs di fueloil contra di aumento riba mercado internacional. Awe a perhudica WEB cu un 150 miyon florin y pueblo mester paga por lo menos un 125 miyon extra durante un aña.

Awo atrobe bou maneho di Minister Glenbert Croes a instruI Utilities pa bypass WEB y inicia un proceso di “Expresion Of Interest” (EOI) pa otorga finalmente e proyecto di un parke di molina na un inversionista cu NO ta WEB, ni Elmar y tampoco Utilities Aruba.

Ta remarcabel y significante cu e trahadonan den WEB mes ta denuncia y bati alarma pa para e proceso cu e minister y Utilities ta canando pa cu e proyecto di parke di molina. Den un presentacion publico cu Minister Glenbert Croes, e directornan di Utilities, WEB y Elmar a duna por a nota cu e proceso ta uno hopi bruha y cu tin un falta di conocemento total di e materia cu ta wordo presenta. Esaki atrobe ta un lastima y ya caba por premira un otro fracaso grandi bou e gobierno actual di MEP-RAIZ. E riesgo grandi ta cu un fracaso di e proyecto aki lo ta sumamente costoso pa Aruba y tambe lo nifica diferente caso den Corte contra e companianan estatal y Gobierno di Aruba. Ta cuanto mas fracaso e fraccionan MEP y RAIZ ta keda sostene y na final ta perhudica ful e pueblo di Aruba!