Miguel Mansur: Parlamentario pastoor a bende su fe pa politikeria

Diamars parlamento a trata e presupuesto supletorio, unda cu gobierno a entrega nota di cambio. Durante e tratamento aki Presidente di Parlamento a hay’e ta hala atencion di un di nan eyden, specialmente momento cu parlamentario di Accion 21 tabata na palabra.

Parlamentario Miguel Mansur di Accion21 tabata na palabra, momento cu tanto parlamentario como minister a reacciona. Esaki a pone cu Presidente di Parlamento, mr. Edgard Vrolijk a reacciona y hala atencion.

El a indica di no sa con e maneho ta di otro caminda, pero den Parlamento di Aruba tin regla y mester sigui cu ne. “Ora cu orador ta papia nos mester respet’e”, el a indica. Tambe el a indica cu mas laat e persona por contest’e.

Vrolijk a splica cu minister tin mas tempo pa contesta. El a pidi pa laga Mansur sigui cu su betoog y despues e otronan por contesta.

Mansur a trece su punto dilanti kico a pasa siman pasa y cu dos parlamentario a gaña pueblo riba oposicion. E kier sa kico mas nan tin di gaña. El a enfatisa cu e gobierno aki ta uno gañado.

Un di e puntonan treci padilanti di Mansur tabata riba e echo cu un parlamentario cu ta pastoor a bende su alma y a traiciona Dios pa shete minister. Cu el a opta pa sinta den parlamento y gana shete pa ocho mil florin. Tambe el a bay riba famia Croes, indicando cu nan ta percura pa set nan mes y no ta percura pa pueblo. Incluso el a reacciona riba Minister Ursell Arends. Aki el a indica cu e mandatario ta bisa di ta gran guy, pero momento cu a sinta negosha cu MEP pa cantidad di minister, e no a mustra esey.