Miguel Mansur kier wak menos tramite y mas accion

Lider di fraccion di Accion 21, parlamentario Miguel Mansur ta forma parti di e delegacion di Aruba participando den e conferencia di InterExpo 2022 na Hulanda. El a comparti cu 24ora, su impresion di e apertura y prome dia den cual a resalta aspectonan di exceso den proceso, espacio pa ahusta leynan fiscal y tambe tereno di enseñansa.

E posibilidad pa cada pais por yega na tratadonan di comercio tambe a bin dilanti riba e prome dia di InterExpo 2022, danki na e participacion di Corsou. Mansur ta considera e tema uno importante y cu e ta recorda a trata na IPKO tambe. “Den teoria nos por bay negocia acuerdo cu otro pais, pero esey ta un competencia di Reino. No tin un bon liña di comunicacion y loke nos kier wak ta un inversion den e institutonan di reino y procesonan cu ta facilita,” e parlamentario a splica.

E kier wak islanan negocia sea ta un acuerdo di belasting of te hasta un acuerdo di comercio. P’esey, den plan di partido di Accion 21 ta propone pa pasa pa un sistema teritorial di belasting cu e desea di wak adelanto pa haci esey na un manera mas eficiente.

Pa loke ta enseñnsa, Mansur ta totalmente di acuerdo cu e presentacion haci pa asociacion di scol di Corsou cu ta urgi pa mayor igualdad den inversion y calidad di enseñansa den Reino. “Secretario di Estado a duna su discurso di apertura, pero nos kier wak accion; nos nos kier pa keda na palabra so. Obviamente ainda ta den spera kico ta bay pasa cu e Rijkswetten,” asina e parlamentario a conclui bisando.
Pa e relato completo, lesa edicion di TREMPAN