Manera tur partido, Partido Accion21 tambe tin su bukinan pa controla. Lider di fraccion, Miguel Mansur, a conta nos cu un oficina di accountant priva ta administra nan bukinan. Ta scan tur informacion provee, tur invoice ta den e sistema. Dus e bukinan tur aña ta manda pa Electorale Raad y tur cos ta na ordo. Obviamente unico donacionnan cu a drenta aworaki na partido ta dje mes y di su tata, no tin ningun secreto eynan.
Mansur: “Nos no a haci rifa, pero otro partido si a haci rifa. M’a compronde cu rifa ta cay pafo di e ley. Pasobra mi no ta kere cu e partidonan tin un registro di ken a cumpra cada rifa di 10 of 15 florin. E ley no ta hopi bon traha. Mi ta kere semper mester tin mas transparencia.”
FONDO PUBLICO PA ELECCION
Den un otro rosea, Mansur a splica cu un plan di partido ta cu ta desea p’e eleccionnan ta financia publicamente manera ta na varios pais Europeo, pa saca cierto placa priva di eleccion. Cu gobierno ta pone un presupuesto pa eleccion, ta dividi entre e partidonan a base di cuanto asiento a haya. Segun Mansur, ta spera cu pa 2028 lo ta uno publicamente financia pa no tin conflicto di interes a base di diferente formula cu por haci. Esey e partido kier trece dilanti den nan plan di partido, con pa saca e placa priva fo’i politica pa e partidonan no depende di donacion. Pa por comunica e mensahe mester di un presupuesto y campaña ta caro. Ta un conflicto di interes cu e partido kier disminui. Pero esey por ta un solucion, Mansur a bisa finalmente.

Comment