Miguel Mansur (Accion21): Sentencia di Hof tocante matrimonio di pareha di mesun sexo ta un logro grandi pa nos pais

Diamars Hof a dicta den e caso di matrimonio pa e parehanan den mesun sexo ta valido, segun constitucion na Aruba. Esey ta conta pa Corsou tambe.

Miguel Mansur, lider di fraccion di Accion21, a indica cu esaki ta un logro hopi importante, algo cu tin ta luchando pa un tempo caba. Ainda Parlamento tin cu bay pasa e ley pa cumpli c’un sentencia di hof. E ley ta cla, ta spera cu otro siman mes lo mand’e pa Raad van Advies.

Recientemente Mansur tabata na Washington tambe, prome cu el a biaha pa Hulanda, pa locual ta e tema di igualdad di genero. Esey tabata un conferencia di lidernan internacional LGBTQ y e bentaha di e conferencia asina ta cu ta haya acceso na e Senador- y Congregistanan Mericano, cual sigur no ta facil. Na Merca ta existi un LGBTQ Conference, di tur e miembronan di Senado y Congreso LGBTQ. A traves di conferencia y contacto haci, via nan por haya entrada na nivelnan hopi halto di Gobernacion Mericano, unda cu por pusha riba igualdad pero tambe riba tur sorto di tematica.

Un di e problemanan cu Aruba como isla chikito ta haya, ta acceso n’e hendenan aki pa cual e conferencia tabata hopi motivante, pa igualdad den henter America y mundo completo. Pero e ta tambe un bon brug cu Aruba por contacta na nivel halto di poder na Merca.

Pa loke ta tratamento di e ley den Parlamento, Mansur a bisa cu e ley ta cla for di juni. El a bay dos biaha pa DWJZ pa un revision tecnico y ta spera cu pa otro siman por entrega e ley aki na Presidente di Parlamento, mr. Edgard Vrolijk. Despues e ta sigui su trayecto pa bay Raad van Advies. Despues di esaki ta sigui e reces pa Pasco. Ta calcula cu pa maart/april lo por trata esaki den parlamento.

Pero igualdad of matrimonio pa pareha di mesun sexo ta un certeza awo cu e sentencia di hof, cu ta algo hopi positivo pa nos pais y sigur p’e comunidad LGBTQ.