Miguel Mansur (Accion21): Durante IPKO a demostra un mentalidad partidista

N’e apertura di IPKO a trata e parti di colonialismo y sclavitud. Otro aña tin e 150 aña di abolicion den Reino. E topico aki tabata uno sensibel, pero asina mes a bay riba e parti di disculpa. Pa Accion21 tabata importante pa musca miho beneficio pa pueblo y tin di laga mentalidad partidista un banda.

Miguel Mansur, lider di fraccion Accion21, a indica cu e topico aki tabata uno hopi sensibel durante e sesion. Nan a papia riba un disculpa y loke e ta kere di a palabra y impresiona cu su coleganan Hulandes, ta c’un disculpa mester ta acompaña cu accion di reparacion.

Hopi di e islanan a puntra e expertonan cu si mester tin accion pa haci bon. E legado di sclavitud te dia di awe ta permanece den racismo institucionalisa tanto na pais propio, na cas, como den Reino y mundo henter. Mansur ta haya cu e ta algo hopi progresivo cu ta bay purba mira ki accion positivo ta tuma hunto. E no kier a uza e palabra sanea, pero mehora e condicion di bida pa tur hende.

Specialmente e minorianan cu desproporcionalmente tabata perhudica. Aki Aruba mester organisa di un forma hopi miho y mester papia cu un bos coherente n’e reunionnan aki. El a duna un ehempel cu si e apertura aki ta existi, no ta na beneficio di Aruba cu por ehempel minister di finansa sali bisa cu e kier kwijtschelding dje mita di e sosten di Coronavirus. Esaki ta bin den wega y obviamente kier un suma hopi mas halto.

E mester ta un proposicion di henter Aruba coordina, no solamente di coalicion of solamente partido MEP.

BUSCA CONSENSUS

Mansur a critica e speech dje presidente di parlamento pa motibo cu esaki tabata di partido MEP. E speech no tabata di coalicion y mucho menos di pais Aruba. Si kier saca miho beneficio pa pueblo, di cual p’esey ta paga nan, ta eligi nan y ta na IPKO, nan mester ta prepara. Tin cu busca consensus y busca punto den comun. E mentalidad partidista cu ta reina y ta mustra durante IPKO, ta destructivo pa pueblo, p’e pais y autonomia, p’e adelanto. E parlamentario kier mira progreso riba esey. Esey ta algo cu mester tin un dialogo nacional y e no ta kere cu mester keda den man politico so. Mirando e fecha cu otro aña ta 150 di aniversario, segun Mansur, “kico nos di Aruba kier logra di esey. Kico ta e oportunidadnan ta existi pa nos crea un miho pais, un miho reino.” Tambe con pueblo di Aruba por beneficia dje oportunidad unico aki.