Miguel Mansur (Accion 21): Si nos no ataca e problema desde reis lo ta tempo perdi!

Diahuebs mainta a tuma luga un encuentro na Parlamento caminda cu a toca diferente tema. Un di nan t’e Landspakket. Lider di fraccion di Accion 21, Miguel Mansur, a comenta cu ta mira e progreso di landspakket ta uno hopi pocopoco. Den e reunion aki a demostra e necesidad p’e rijkswetnan. Sin intervencion di Hulanda no lo bay logra e cambionan.

Mansur a cuminsa na comenta por ehempel riba e bahamento di gasto di gobierno y haci e sector publico mas eficiente.

Prome minister repetidamente a bisa cu e no lo kita ningun hende fo’i trabao. Ta un conocemento universal cu tin demasiado hende trahando den gobierno, segun e parlamentario.

Si no ataca e problema n’e reis, ta perdemento di tempo.

Mansur a puntra e representante di ministerio di labor kico a pasa originalmente. Den e landspakket tabata inclui modificacion y modernisacion di LMA. Awo esey ta bari fo’i mesa. “Si no ta bay mishi cu e LMA, ta tempo perdi. Sector publico t’e parti mas ineficiente y improductivo di nos pais y nos economia. Si nos no ta bay mishi cu e problemanan berdadero, nos no ta bay biba e solucionnan”, segun Mansur.

Motibo cu no lo bay mishi cu e problemanan pasobra no tin boluntad politico. Manera e partidonan bieu ta traha, nan no ta tuma ningun paso cu por costa nan un voto y asina ta sigui bay atras. “Sigui sink den debe y sigui keda sin reforma y restructura nos pais pa futuro. P’ami realmente a trece dilanti e necesidad p’e rijkswetnan y personalmente ta convenci cu sin intervencion di Hulanda nos no ta bay drecha e pais aki”, Mansur a bisa finalmente.