Miguel Mansur (Accion 21): Si gobierno bay casacion contra matrimonio di mesun sexo lo bringa esaki den parlamento

Diabierna ultimo tabatin un vonnis cu a sali fo’i hof, declarando cu bao di nos constitucion cu e parehanan di e mesun sexo tin e mesun derecho pa casa.

Segun lider di fraccion di Accion 21, Miguel Mansur, ta un logro di fundacion Orguyo, cual Mansur ta hopi gradicido pa nan trabao duro, specialmente abogado David Wever, kende a prepara e caso.

E parlamentario a sigui splica cu Fundacion Orguyo hunto cu e organisacion Igualdad Korsou, a bay corte y a bringa e caso aki fantasticamente y a yuda crea un sociedad mas igual, cual e parlamentario ta kere cu esey mester ta e inspiracion pa futuro.

Realmente berdad, e ta un topico hopi controversial si. Ta reconoce cu no lo bay yega na otro riba e topico aki. Por a mira na Aruba, movecion di cierto grupo di mayor. Tambe por a mira hopi hende cu a vocifera nan contra di e ley aki. Por a mira tambe na diferente parti na mundo cu tin un modus operandi, cual ta practicamente hopi transfobico y homofobico y aparentemente e bataya ey a yega na Aruba tambe.

Loke cu Mansur ta haya falta na Aruba ta liderazgo. Parlamento tambe tin un ley pa introduci pa pareha di e mesun sexo, cual lo entrega e siman aki na parlamento y lo bay Raad van Advies.

Si e vonnis bira definitivo, e ora lo ta codificacion di e vonnis.

Si e no bira definitivo, e gobierno di Aruba haci e fout di bay casacion, e ora lo bringa esaki den parlamento tambe.

Si lesa e vonnis, unda cu hof tabata hopi cla, cu nos constitucion no ta permiti discriminacion y tambe nan tabata hopi cla cu te hasta si un mayoria, cual nan ta bisa cu nan no ta convenci cu ta existi, cual a haci estudio na 2021 of 2022, unda cu a nomina esaki n’e premio di e consultornan politico di America. Realmente 57% di nos poblacion ta na fabor pa trece igualdad na Aruba y 43% ta contra.

Hues a bisa tambe cu si un mayoria ta contra di un matrimonio, no ta conta p’e depriva un minoria den su derechonan civil.

No por pone un referendum riba derecho civil di ningun persona.

Aruba ta un pais catolico y nos constitucion ta garantisa libertad di creencia y di e mesun forma Mansur por bin bisa tambe cu “e ta cansa di e sectanan cristian, ta haci maldad den nomber di Dios, ta purba di trece sufrimento cerca e minorianan cu no ta asocia cu nan. Dus kier un referendum na Aruba pa tur hende vota si ta permiti otro creencia cu no ta catolico. Porta un mayoria di e pais ta catolico y ta dicidi cu no y kier pa tur hende kier ta educa religiosamente den e fe mayoritario.”

Esey ta contra di nos constitucion y esey no ta apto, segun e parlamentario.

Pa mas informacion Lesa mas den TREMPAN.